SHILLONG:
U Symbud Myntri Rangbah ka jylla, u Bah Prestone Tynsong u la ong ba ka rai jong ka ïing Kashari High Court kan ym ktah eiei ïa ka jingïakren pynbeit ïa u pud u sam hapdeng ka jylla Assam bad Meghalaya, ha ka wat baar, haduh ba ka ïing Kashari ka shim da kawei pat ka rai.
Lah ban kdew hangne ba ha ka hukum ka High Court mynta ka sngi, ka la bthah ba ym dei ban leit thung mawpud, ne ruid pud ha madan ha kine ki sngi tad haduh ban pyllong biang ïa ka sngi bishar. Kane ka hukum jong ka ïing kashari, ka long hadien ba ki saw ngut ki khlieh nongsynshar, ki la ujor sha ka kashari halor kane ka jingpynbeit pud hapdeng ka Assam bad ka Meghalaya. Ki khlieh nongsynshar kiba ujor ki long u Bah R Hamberley Wahlang, Syiem ka Hima Jirang, u Bah Ainam Manik, Acting Syiem ka Hima Mylliem, u Bah Pholasly Nianglang, Sirdar ka Nonglang Sirdarship bad u Bah Erald Jyrwa, Acting Syiem ka Hima Nongspung.
“Ngin ap shwa haduh ba kan don ka rai da kumwei pat hynrei ka jingïakren kan bteng beit haduh ban da don kano kano ka rai na ka ïing Kashari halor kane ka dorkhas ba la ujor ha ka High Court”, u la ong.
U Bah Prestone u la ong, “Haei uta u mawpud? Bad ka MOU kaba la pynbeit ha ka wat ba nyngkong, ka long tang ban shu ïasoi ïa ki jingmynjur halor ki jaka, ki shnong ba kin leit sha kano ka jylla hynrei ban ithuh bniah ïa u pud u sam ka dei lyngba ka jingjurip ka Survey of India, kumba la dep ban bthah ryngkat ka jingdonlang ki ophisar na Assam bad Meghalaya ha ka por ba ki pynlong ka jingjurip”.
Halor ka jingsdang ka jingïakren ïa ka wat baar jong ka jingpynbeit u pud u sam u Bah Prestone u la ong ba ka Regional Committee na ka thaiñ Ri Bhoi District la dep ban sdang ha ka jingïalang ba nyngkong ban ïakren tang hapoh jylla shwa bad ka Assam ruh ka la dep thaw ïa ka Regional Committee na ka liang jongka.
Ki Regional Committee na ka thaiñ Ri Bhoi, Jaiñtia Hills bad West Khasi Hill ki dang lum dang lang ïa ki kot ki sla, bad ïakren bad ki briew ba don bynta, la ki dei ki Syiem ki Rangbah Shnong, ban lum ban lang ki kot ki sla.
