SHILLONG:
U Myntri Rangbah ka jylla, u Conrad K Sangma ha ka 23 tarik Jylliew u la ïathuh ba katkum ba la lum jingtip naba sdang, la lah ban pynthikna ba ka jingtwa jong ka kynroh ba 10 mitar jong ka jingtei ba thymmai jong ka PA Sangma Stadium ha Tura kaba la khyllem ha ka 22 tarik Jylliew ka dei na ka daw ka jingsahkut ha ki nala pyntuid um.
Na ka liang u Conrad Sangma u la kren ïa kane ha ka 23 tarik Jylliew, hadien ba la dep pynlong ïa ka jingïalang halor ka jingkhyllem ka kynroh hynnin ka sngi, ha kaba la aiti ha u ïa ka kaiphod ba la pynbiang da ki engineer bad ki kontraktor ynda ki la dep ban bishar.
“Katkum ka kaiphod, ki nala pyntuid um kiba don ha kane ka stadium ki la sahkut,” u la ong.
Haba ïathuh ba ka don ar bynta jong ka jingtei ïa ka stadium, u Conrad Sangma u la ong ba ka bynta banyngkong ka la dep pura bad ka kynthup ïa ka madan ïalehkai phutbol ha kaba ka jinglut ka shongdor la kumno kumno T 50 klur.
“Kane ka dei ha ka jaka ba la jia kane ka jingkhyllem. Ka bynta ba-ar jong ka jingtei ïa ka stadium kaba dei ka indoor stadium, ka jinglut ka shongdor kumba T 70 klur. Ka jingpyntrei ka dang ïaid shakhmat bad na ka daw ba ka jingtreikam ka dang bteng ha ka jingtei ba-ar, ki nala tuid um ki la sahkut bad ka la pynlong ïa ka um ban ym don shuh ka lynti ban tuid, kane ka la pynkhia ïa kane ka bynta jong ka kynroh kaba la khyllem pat na ka jingkhia ka um,” la ong u Myntri Rangbah ka jylla.
U Conrad Sangma u la ong ba ka jingpynthikna ka long katkum ki jingdro bad ki jingtip ba la ai bad la batai ruh ïa ka kynroh katkum ki jingbthah. “Kam don jingbakla ha ka bynta jong ka jingpyntrei, la bud lut ïa ki mat jong ka rukom pyntrei. “Ka dei tang na ka daw jong ka nala bad ka jingpei um ba la jia kane ka jingjia. Ngi la leh ïa baroh ki jingdonkam khnang ba kan ym don shuh ka jingshah ktah ïa ka stadium,” u la bynrap.
Shuh shuh, u la ong haba khmih kyllum ïa baroh ki jingtei, ki jaka ïeng bathymmai kiba ki la shna ki long kiba biang bad katkum ka kaiphod ka paw ba kam don kano kano ka jingjulor ha kiwei pat ki bynta jong ka jingtei.
“Katkum ka kaiphod ba la lum, ka kynroh ka la khia eh tang ha ka shibynta jong ka 10 mitar ha kaba ka jingkhia jong baroh kawei ka madan ka la ban ha kawei ka jaka kaba la pynlong ïa kane ka bynta ban khyllem,” u la ong.
U Myntri Rangbah ka jylla u la ïathuh ba u rishot u ba jrong tam u ba don ha kane ka madan ïalehkai ruh u skhem namar ba biang ka tyllong jong ka kynroh kaba kyrshan ïa u. “Ka tyllong ka jylliew kumba 9 mitar bad katkum ka jingkheiñ jong ki, une u rishot ba jrong u skhem hynrei khnang ban kiar lehse ïoh lah ban don kaei kaei, ki dang tohkit shuh shuh bad ki dang pynduna noh ïa ka jingkhia shipor ïa ki rishot khnang ban lait na kano kano ka jingjia,” la ong u Conrad.
Hapdeng kine, la buh ïa ka magisterical inquiry ban tohkit halor kane ka jingjia. “Ki engineer bad ki kontraktor ki don sha madan bad ki dang shim ïa ka rai ban pynthikna ba kan ym don shuh kano kano ka jingshah pynjulor ïa kane ka madan stadium,” la ong u Conrad Sangma.
