SHILLONG:
U Chief Excutive Member (CEM) ka Khasi Hills Autonomous District Council (KHADC), u Bah Pynïaid Sing Syiem, u la kyntait ïa ka jingkynnoh ba ka jingpynhap shuki ïa ki Chief Executive Member (CEM) ka KHADC ka dei na ka daw ba ki shim khia ban khynra ïa ka Trading Laisen.
Lada kdew hangne ka jinghap shuki ki CEM ha ka KHADC ka ju ïai jia tang hadien ba na ka liang ki CEM ki la shim ïa ka rai ban pynlong ïa ka jingkhynra ïa ka trading laisen, tang hapoh kane ka 4 snem mynta ka EC ba la ïalam da u Bah Teinwell Dkhar ha u snem 2019, hapoh ka jingïalam u Bah Paul Lyngdoh kum u EM Incharge ka tnad Trade, ka la khyllem noh tang hadien ba na ka liang u Bah Paul u la pynlong ïa ka jingkhynra trading laisen ka ba jur ha kato ka por, kumjuh mynta ka kynti na ka liang u Bah Titosstarwell Chyne u CEM barim ka KHADC ha ki bnai ba la dep u la pynïaid shait shait ïa ka jingkhynra trading laisen bad hapdeng kane tang da ki taiew u la shah pynkhyllem noh.
Haba kren sha ki ladpathai khubor u Bah Pynïaid Sing Syiem, u la ong, “Ban pynshong nongrim hangta ïa ka jingkhyllem ki CEM kam dei kaba shisha namar ba ïa ki briew kiba na bar jylla, ka Council kan ym lah ban map, ba kin pynïaid ïa ki kam khaïi khlem ka trading laisen”.
U la ong, “Ka Council ka la buh khnang ïa ka kyndon Trading by Non Tribal Regulation Act, ban tehlakam ïa ka jingthmu ki briew ha ka jylla haba ki la nang ban seng la ki kam ki jam kin ïoh ban trei kam hi da lade”.
U la ong shuh shuh, “Kumba ka long mynta kiba bun ki ba la wan ban ïakren halor ka trading laisen ngin sa kham tip katto katne por hynrei ka khubor ka ba shai hi sha ki bar jylla ka long ba wat mut ba kin ïohlad ban khaïi laitlan khlem ka trading laisen da wan kane ka EC thymmai”.
U la bynrap, “Wat sngew shngaiñ halor kane bad ïa ka kam khynra trading laisen kum ka Council kan ïaid beit bad ïa ki bym ithuh ïa ka District Council lada dei ban khang ïa ka kam jong ki ruh ngin khang bad tang ïa ki ba wan ban apply da ka lynti ka ba dei kata ruh kan shong ha ka EC ban pynduh ne ban ai ïa ki”.
Ha ba kylli halor ka jingai NOC na ka bynta ka lynti rel, u Bah Pyniaid Sing Syiem u la ong ha ka ba ïadei bad ka jingai NOC na ka bynta ban shna ïa ka lynti rel, kum ba la rai ha ki por mynshwa mynta ruh ka KHADC kan ïeng ha ka juh ka nongrim ban ym ai NOC.
