SHILLONG:
U Myntri Rangbah ka jylla u Conrad K Sangma ha ka 14 tarik Naitung ula ong ba ka jingkylli ban phadien biang ïa ka Roster kan ym mih shuh, namar ka Office Memorandum (OM) kala dep mih ban pyntreikam ïa ka Roster System bad kane ka dei ka rai kaba khatduh.
Ïa kane u la kren halor ka jingkylli kaba ïadei bad ka jingshong shah thngan ba khlem buh por jong ka ACHIK ba dawa ïa ka Sorkar ban pyntreikam ïa ka Roster System naduh ki snem ba la leit noh bad ban wanrah ïa ka Winter Capital ha Tura, West Garo Hills District.
U la bynrap ba yn ym lah satia ban phaidien shuh namar ba ka Sorkar Jylla kala dep ban ïasyllok bad baroh ki kynhun bapher bapher hashuwa ban wanrah ïa kane ka OM ba thymmai, bad u la ong ba ka ACHIK ruh ka ïadon bynta lang ha katei ka jingïasyllok halor ka OM ba thymmai.
“Kaba kongsan ka long ban pynthikna ba ka Roster System ka dei ban pyntreikam bha kumba ka long ha ki sngi ban sa wan, bnai bad snem bad kane ka long kaba kongsan ïa ngi bad kane ka dei kaba ngi khmih lynti” ula ong.
U myntri rangbah ula ong ba ka Sorkar kam lah satia ban weng noh ïa ki briew kiba dei na kiwei pat ki jaidbynriew hadien bala dep thungkam ïa ki namar kane kam ïahap bad kam long hi ruh.
Halor ka jingdawa ïa ka Winter Capital, u Conrad ula ong ba kane ka dei ka jingdawa kaba la slem bha bad kine baroh ki dei kiba don jingïadei bad ka ïoh ka kot.
Haba pynpaw ba ka Sorkar ka la pynthikna ba ki kam pynroi kila poi ha baroh kawei ka Jylla, u Myntri Rangbah ula ong ba ha ka sien ba nyngkong he, ka Sorkar kala buh ïa ki Mini Secretariat ha ki thaiñ bapher bapher jong ka Jylla ba kynthup ïa ka Tura, Jowai bad Pynursla.
