SHILLONG:
U Dr Mukul Sangma, u MLA ka Trinamool Congress (TMC) u la kynnoh ba ka jingbym treh ban shimkhia bad bteng ïa ki sienjam ba ki sorkar barim ki la shim ka buh ïa ka jylla ha ka jingeh ha ka ba ïadei bad ka jingkyrduh bording electric ha ka jylla.
Haba kren sha ki ladpathai khubor, u Dr Mukul u la ong ka jingeh kaba ïadei bad kane ka tnad ka long ka ba la paw lupa naduh ki snem ba la dep kumta ki sorkar ba rim ki la pyrshang ban shim ïa ki sienjam ban pyndap ïa ki ne ki jingduna da ka ba shim ïa ki katto katne tylli ki sienjam.
“Hynrei kumba ka long ka jinglong jingman mynta ngam lyngngoh namar baroh ki sienjam ki ba la dep ban shim ha ki por mynshwa ban tehlakam ïa ka jingkyrduh bording jong ka jylla la shah pynduh pyndam lut”, u la ong.
“Ha u snem 2008 -09 katno tylli ki power project ka sorkar ha ka to ka por ka la shim na ka bynta ban wanrah jingmyntoi hynrei kine baroh ki la shu shah pynduh ha ka jingleh politic ki katto katne tylli ki party. Wat ha kato ka por ngim don ha ka sorkar hynrei ka la don ka jingshim khia ban pyndap ïa ka jingduna bording ha ka jylla”, u la bynrap.
“Ka ju don ka jingduna bording, ha ka por rkhinag hynrei ha ka por lyiur ngi dei ka jylla ba pahuh bha ïa ka bording bad ka dei ha ngi ban pyndonkam ïa kata bad ngi la shim ki sienjam ban pyndonkam ïa kane kat kum ka Electricity Act 2003 bad kumjuh ka policy ba la shim da ka Sorkar jylla bad ka sorkar Pdeng hynrei kum ki nongmihkhmat haba ki wan ha ka bor ki lah shu pynduh pyndam ïa kaei ka rai kaba ka sorkar barim ka la shim”, u la ong.
U Dr Mukul u la ong, “Ha ka jingshisha kum ka sorkar ka dei ban shim ka jingkitkhlieh ban bishar bad bteng ïa kaei ka ba sorkar barim ka la dep ban shim, namar ka dei na ka bynta ka jingbha jong ki nongshong shnong ha ka jylla. Ki dei ban bishar shwa ïa kine bad lada don ka jingartatien ki lah ban pyndam da ka ba shim ïa ka jingkitkhlieh ban bishar shwa”.
U la bynrap, “Ka Meghalaya ka la dei ban long ka jylla ka ba lah ban die ïa ka bording sha kiwei ki jylla kiba mad kum kane ka jingeh, wat ha ka ba ïadei bad u dewïong ka jylla ka lah ban long ka nongshalan dewïong, u ba ki ju pyndonkam ban pynmih bording hynrei ka Meghlaya ka dei ka lanot jong ki nongïalam ki ba ym ju pyndonkam ïa ka jingmut jingpyrkhat, ki la shu shim ka rai namar ba ki don ka jingmut jingpyrkhat ka ba jaboh ki la pynduh pyndam noh ïa baroh ki rai ki ba ngi la dep ban shim”.
U Dr Mukul u la kdew “Kum ka jingpynduh pyndam ïa ka jingïasoi bad ka NEEPCO, na ka bynta ha Hydro Electricity Generation bad ka Thermal Power Generation, ka jylla ka ba la lah ban pynmih bun u dewïong ban shalan sha ka NEEPCO, wat la ïa ka NEEPCO la thaw da ka sorkar India da ka ba pyrkhat ïa ka jingdonkam bording jong ki jylla ha ki thain shatei Lammihngi bad ka don headquater ha Shillong ïa kane ruh ki pynduh”.
“Kane ka jingleh jong kane ka sorkar ka pyntieng ïa ki nongbei pisa, uno uno u nongbei pisa u ba don ka pisa ka ba biang u lah ban leit bei pisa shano shano ruh, bad ka dei ka jingshisha ba ka long ka ba eh bha ban pynkohnguh ïa ki ban bei pisa ha ki project ha ka jylla Meghalaya. Hynrei haba ngi la lah ban leh ïa kata ruh ki wan ki wei bad ki pyntieng ïa ki ban phet. Mano ban wan ban bei hangne? Kane ka jingleh jong ki ka dei ka ba wanrah jingeh ïa ka jylla”, u la bynrap.
U la ong shuh shuh, “Ka jingmad jingeh jong ki paidbah mynta kumba ka long ka dei na ki nongmihkhmat ki bym don ka jingkitkhlieh bad kum ka tnad bording kum ka jylla ka don bun ki lad ban pynmih bording bad kadei ban rai kaei ka ba donkam ïa ka jingdonkam ha ka jylla. Ha ka por lyuir ba pahuh ka um ki lah ban pynmih bording shibun ngi ju pyntreikam ïa ka jingai kylliang ïa ka bording sha ki jylla ki ba duna ka bording bad ki dei ban ai kylliang biang ynda ka jylla ka la duna, khlem donkam pisa” .
U la bynrap, “Hynrei mynta ki la pynkylla lut ïa kane bad ki la pyntreikam da kumwei ïa kane dei ban kylli ïa ki balei? Kadon kano kano ka daw hynrei dei na ka jingkhwan myntoi jong ki? Mynta hap ban kylli katno ki siew 1 unit ka bording ki shim ïa ki sienjam ki ban pynkhia ïa ki nongpyndonkam bording”.
