SHILLONG:
Hapdeng ka jingïakhih ka Voice of the People Party (VPP) ban dawa ban pynbeit ïa ka reservation policy ha kaba u President ka seng u Bah Ardent Miller Basaiawmoit u la pynlong ka jingshah thngan kabym buh por, u Myntri ka tnad pule puthi ka jylla u Rakkam A Sangma, ha ka 25 tarik Jymmang u la kynthoh ïa ka VPP da kaba ong ba ka jingleh ka VPP kan wanrah jingeh ïa ka jylla.
Haba kynthoh ba ka jingleh ka VPP ka dei tang ka jingleh politik bad ka jingleh drama, u Sangma u la maham ba ka Supreme Court ka dang peit bniah ïa ka jinglong jingman lada kane ka ïai bteng, bad u la ong, “Ngi ïalehkai bad ka ding bad kan ing ïa baroh, kynthup ïa ka VPP. Kan pynjot ïa ka lawei jong ki samla jong ngi.”
U Sangma u la kdew ruh ïa ka case ha u snem 2014 ha Maharashtra, ha kaba u nongujor u la ujor pyrshah ïa ka hukum jong ka sorkar Maharashtra sha ka Supreme Court halor ka jingbhah ïa ki shuki ba la mang na ka bynta kawei ka jaitbynriew palat ïa ka 50 per cent. U la ïathuh ba ka Ïingkashari ka la pyndam noh ïa kane ka hukum bad ka la ai ïa ka jingpyntip sha baroh ki jylla ha ka Ri, kaba kynthup ïa ka Meghalaya, ha kaba la pynkynmaw ïa ki jylla ba u pud ba lah ban shah (permissible limit) u long 50 per cent.
“Ngi don ha ka jingshong syier namar ka Meghalaya ka ïoh haduh 85 per cent ka bhah kam bhah jam (reservation) – 80 na ka bynta ki Khasi-Jaiñtia bad ki Garo bad 5 per cent na ka bynta kiwei pat ki jaitbynriew riewlum. Haba ka Supreme Court ka la pan ka jubab na ki jylla, ka sorkar Meghalaya ha ka 27 tarik Lber 2021 ka la pynksan ha ka jubab halor ka 85 per cent ka bhah na ka bynta ki jaitbynriew riewlum. Ka Supreme Court kam pat shym la shim kam eiei halor kane,” u la ong.
U Myntri ka tnad pule puthi, u la kren ruh shaphang ka jingjia ha Ïing Bishar ba ha khlieh duh (Supreme Court) ha u snem 1992 ha kaba ka Ïing Bishar ka la bthah ïa ka sorkar Kerala ba kano kano ka bhah thung kam thung jam kan ym tam palat ïa ka 50 per cent.
“Ka Supreme Court ka dang peit bniah ïa ka jinglong jingman jong ngi. Lada ngi ïai bteng ïa kane ka drama, kaei kaei ka lah ban jia bad lada shah weng noh ïa ka policy jong ngi, ka jingkitkhlieh kan hap ha ngi namar kane kan ym dei kaban jia tang shisien, ka la jia mynshwa ruh. Lada ka jia, ki pateng ban wan jong ngi kin ym map ïa ngi,” la ong u Sangma.
Haba kren biria ïa u nongïalam ka liang pyrshah, u Bah Ardent Miller Basaiawmoit , u Rakkam Sangma u la ong ba ka jingïatai ka lah ban kren kyllum da ar tylli ki jingkylli kata, mano ba kyntiew ïa ka Ïing Dorbar Thawaiñ bad mano ruh ba pynkhyllem?
“Map ïa nga, ngam dei ba nga kren kum u jaitbynriew Garo lane kum u Rakkam Sangma hynrei kum u Myntri ka tnad ka Pule Puthi hapoh ka jylla,” u la ong haba u kyntu ïa u nongïalam ka seng VPP, u Bah Ardent Miller Basaiawmoit ban sngewthuh ïa ki jingeh ki ba ap na ka jingleh jong u.
“Ngi dei ban sngewthuh ïa kaei kaba ap na kane ka drama bad ka saiñpyrthei. U Bah Ardent u dei u nongïalam ba la kham rangbah, u long kum u hynmen jong nga, u dei u briew u ba la nang la stad- u dei ban sngewthuh kaei kaba ap nadien jong kine baroh. Kum kane ka jait saiñ hima sima bad ka drama kan sa pwanrah jingeh ïangi. Ngin sa poi sha ka jingduhnong,” u la ong.
