SHILLONG:
Ka jingwan lyngshop ka jingpang Lumpy Skin disease (LSD)ha kane ka jylla ,ym lah ban len ba ka la don ka jinghiar arsut ha ka die ka thied ïa ka doh masi ha ka jylla bad kane ka la wanrah ïa ka jingeh ym tang ïa ki nongdie doh masi hynrei wat ïa ki nongdie dud, ki dukan sha bad kiwei kiwei namar ka jingsngewsalia jong ki nongbam nongdih ban pyndonkam ïa ka jingbam ba mih na ka masi.
Ha ka 18 tarik Jylliew, na ka liang ka kynhun “Butcher Association of Meghalaya”, ki la mih sha khmat ban dawa na ka tnad Animal Husbandary and Veterinary ban pynshai paidbah halor ka jinglong jingman jong kane ka jingpang khnang ba ki paidbah ruh kin hun ban bam ïa ka doh masi ha ka jylla.
Ha ba kren sha ki ladpathai khubor, u Bah Esron Marweiñ u la ong, “Hadien ba ka jingpang LSD ka la wan ban lynshop ïa ka jylla, ngi kum ki nongdie doh masi ngi don hapdeng ka jingeh bad ka khia shon namar ba kum ki nongdie doh masi ki la bun ki ba la hap ban khang noh sa ïa ki dukan ruh na ka jinglong jingman ka ïew” .
U la ong shuh shuh ,“Naduh ba ka tnad Animal Husbandary and Veterinary, ka pyntip paidbah ïaka jingdon ka jingpang LSD , ka la ktah shibun ïa ngi ki nongdie doh namar ki paidbah ki la sngewsalia ban thied dohmasi khamtam haba ki peit ïa ka jinglong jingman ki masi ki ba ngat ha kane ka jingpang” .
“Wat la ka tnad ka la pynshai ïa ki katto katne bynta ha ka ba ïadei bad kane ka jingpang hynrei kam ai pat ïa ka kaiphot ka ba pynshai bha ba haduh katno la lah ban pynkoit ïa kane ka jingpang ? bad ka khlem pynshai ruh halor kane ka jingpang ka ba la lah ban pynkoit khnang ba ki paidbah kin hun ban bam ïa kane ka doh”, u la bynrap .
U la ïathuh shuh shuh ,“Na ka liang ka Association , ka la leit ruh ban ïakynduh bad ki heh ophisar ka tnad ban pan ïa ka jingpynshai halor ka jinglong jingman kane ka jingpang kum shibynta ban pynthikna ïa ka jingshngaiñ haba bam bad die ïa ka doh bad na ka liang u Joint Director ka Tnad u la pynshai ba kane ka jingpang kan ym ktah eiei lada bam ïa ka doh, hynrei tang katto katne sngi hadien, na ka liang u secretary ka tnad u la phah pynmih pat sa kawei ka jingpynshai ba ym long ban bam ïa ka doh bad ban dih ïa ka dud masi ki ba la ngat ha kane ka jingpang” .
U bah Marweiñ u la ong ba kane ka jingpynbna ka tnad ka la wanrah ïa ka jingduh jingshaniah na ka liang u paidbah ban thied bad bam ïa ka doh masi bad ban dih ruh ïa ka dud masi, watla katta kum ka seng ka la wad ïa ki lad ki lynti ban ïoh ïa ka jingshaniah jong u piadbah ban bam biang ïa ka dohmasi .
“Kumta na ka liang ka tnad ka la kular ba ha ka sngi thohdieng kan sa pynmih noh ïa ka jingpynshai paidbah la ka la long ne kam pat long ban bam ïa ka doh masi ba la don une u khñiang jingpang hynrei ka khlem, leh eiei bad kane ka wanrah ïa ki paidbah kumjuh ïa ngi ki nongdie ban sah ha ka umdum ka ba khraw”, u la ong .
U la bynrap , “Haba ngi la kynduh ïa u secretary ka tnad u la ïathuh ba kan ym shim por shuh ba kane ka jingpang kan khuid noh na ka jylla , hynrei haduh mynta ka association kam shym la ïoh khubor eiei halor kane ka bynta”.
U Bah Marweiñ u la ïathuh shuh shuh da kaba ong, “Ha ki por mynshwa ka dukan ka ba ju die uwei u masi, mynta pat tang 10 kg ruh kam lah shuh ban die, ka ba pynlong ïa ki nongdie doh ban sangeh shwa ïa ka jingdie doh masi namar la bun sa tang ka doh ka ba sah ban die ym ju lah” .
“Ngi kyrpad ïa ka tnad ba ka donkam ban pynshai paidbah halor ka jinglong jingman jong kane ka jingpang khnang ba ki paidbah ruh kin suk mynsiem ban thied ïa kane ka doh masi namar haduh mynta man ka sngi ki la shu pynmih ïa ka jinglong jingman jong ka jingpang bad ngi kyntu ba u myntri u dei ban pynshai halor kane ka bynta namar na kane ka ktah ym ktah tang ïa ngi ki nongdie doh hynrei wat ki dukan sha ruh ki la shah ktah jur”, u la ong .
