SHILLONG:
U Myntri ba dei ban peit ïa ka tnad Bording ha ka sorkar Jylla u Abu Taher Mondal ula kdew ba ka daw ba ka sorkar ka la hap ban pyntreikam ïa ka jingpynlip ïa ka bording elektrik ka dei na ka jingduna palat ka um.
Ha ba kren sha ki lad pathai khubor u Mondal u la ong ba ka dei ka jingshaisha ba ki nongshongs hnong ha ka jylla ki mad ïa ki ba bun ki jingeh na ka jingshah pynlip ïa ka bording elektrik, bad halor kane ka sorkar ka don ka jingnsgewkhia khamtam ki khynnah pule ki ba dang don ka eksamin jong ki, hynrei namar ba ka dei ka aïom tyrkhong, bad bun na ki jaka pynmih bording elektrik kim lah ban pynmih bording namar ka jingduna jong ka um ha ki wah kiba shaniah ha u slap ban shlei.
“Nalor kane ka don ruh ka jingeh ba ki don na ki project jong ka sorkar pdeng, ki ba dei ban bhah ïa ka bording elektrik, na ka bynta ka jylla ruh kim shem la lah ban pynbiang bad na ka daw ka jingkhang ïa ki katto katne tylli ki project, ka jylla ka don hapdeng ka jingduna ka bording elektrik”, u la ong.
U Myntri u la kdew ba “Ha ka por ba lyiur, haba ka jylla ka ïoh ban pynmih bun ïaka bording elektrik ka ju ai lang ïaka bording sha kiwei pat ki jylla ne sha ki kynhun bad haba ka jylla ka mad ïa ka jingduna ban pynmih bording ka ju shim biang ïa kane ka bording elektrik na kine ki ba ka jylla ka la ai kylliang, hynrei mynta namar ba kiwei ki jylla ki don hapdeng ka aïom tyrkhong, kim treh ban ai kylliang ïa ka bording sha ka jylla namar ba ka jur palat ka jingdawa ïa ka bording elektrik”.
U la bynrap “Na ka liang ka MeECL bad ka Sorkar jylla mynta ki dang trei shitom ban ïaleh ban weng ïa kum kine ki jingeh, ki ba la ktah bha ïa ki nongshong shnong ha ka jylla”.
U Mondal u la ong “Ka jingpyntreikam ïa ka jingpynlip bording elektrik ha ka jylla da ki ba bun bun kynta, kam dei ka jingleh khnang na ka liang ka sorkar hynrei ka la hap ban pyntreikam ïa kane da ka jingbym banse namar ka jingpynmih duna palat ïaka bording elektrik ha ka jylla”.
U la bynrap shuh shuh, “Ka ne ka jingpynlip ïa ka bording elektrik ha ka jylla yn sa lah ban kham pynjynsur noh ïa ki kynta ynda ka jinglong jingman ka la kham biang”.
U Myntri u la ong shuh shuh ba “Kumba ka long mynta, ka jylla ka dang lah ban pynmih tang 88 MU (Million unit) ka bording elektrik, hynrei ha ba phai sha ka jingdonkam ka jylla ka donkam haduh ka haduh 200 MU (Million Unit) bad ka jylla ka duna haduh 112 Million Unit”. Ha ka ba ïa dei bad ka jingshim ïa ki sien jam na ka liang ka Sorkar u Myntri u la ïathuh ba ka sorkar ka la dep ban shim ïa ki rai ban pynmih bun ïa ka bording ha ka jylla bad ha ka ba ïadei bad kane ka la dep ban ïasoi ïa ka Memorandum of Understanding (MoU) bad ki kompani shimet, na ka bynta ban pynmih bording elektrik.
“Hynrei kane kam shem la lah ban pynurlong namar ba don na ki Company ki ba la don jingmut ban pyntrei ïa ka kam, kim shem la sdang namar ka jingdon ki jingeh hynrei na ka liang ka sorkar ka dang wad ïa ki lad ki lynti ban weng ïa kane ka jingeh, khnang ba kin lah ban pynïaid noh sha khmat ïa ki kam” u la ong.
Haba kylli halor ka jingshah ram ka MeECL u Mondal u la ong “Halor ka jingshah ram ka MeECL, ym don kano kano ka jingkheiñ kaba thikna namar ka MeECL ka ju siew man ka por ïa kane ka ram bad pynthikna ruh ba na ka liang ka sorkar kan dang kyrshan ïa ka MeECL”.
