NONGSTOIÑ:
Ka Seng Khasi Student Union (KSU) Mawshynrut Circle ha ka 31 tarik Lber kala ïoh ban plie paidbah noh ïa ka ophis treikam jong ka Seng kaba don hapoh Mawthengkut jong ka Mawshynrut Civil Sub Division.
Ïa kane ka ophis treikam jong ka Seng KSU la wan ban plie da u President ba rangbah jong ka Seng u bah Lambokstarwell Marngar kum u kongsan ha ryngkat ka jingïadonlang ki dkhot bad nongkitkam ka KSU, ki nongïalam barim ka Seng, ki riew rangbah bad kiwei kiwei kiba la shah khot sngewbha.
Na ka liang jong ka Seng kala ïoh ruh ban pynkup burom ïa ki samla pule kiba la wan shakhmat ha ki jingpule bapher bapher lyngba ka Maitshaphrang Academic Award 2023 ïa kaba ka seng ka ju leh manla u snem kum shi bynta ban ai mynsiem ïa ki samla pule ka dong ka thaiñ.
U Samla Armstrong Sohshang u la ong ba hadien ba ki nongïalam barim ka KSU Mawshynrut Circle kila aiti ïa ka dulir khyndew ha ki nongïalam ba thymmai bad kaba la pynktik ruh ïa ki nongïalam ba thymmai ban pynïoh ban tei noh sa ïa ka ophis treikam jong ka Seng hadien ba ki nongïalam barim kila lah ban pynïoh ïa ka jaka.
Katba na ka liang jong u nongïalam ba rangbah duh ka Seng KSU haba ai jingkren kum u kongsan u la ong ba na ka liang jong ka Seng ka ju bthah bad ju ai jingmut sha ki shnat treikam bapher bapher ba kin buh ïa ka pule puthi kum kawei na ki ishu kaba ha khmat tam.
Shuh shuh u la ong ruh ba ka Seng kala sdang ïa kum kane ka sienjam ban ai ka jingithuh ba kyrpang ïa ki samla pule kiba wan shakhmat ha ki kyrdan paher bapher kala sdang naduh u snem 1993 bad kadei ruh lyngba ka jingsdang jong ka KSU ba wat ka sorkar ha ki snem kiba kham hadien ruh kala sdang ban bud ïa kajuh ka sienjam ba ka KSU kala leh.
Kane ka jingpynkup burom ka Seng ïa ki samla pule ka long kum shi bynta ban pyrsat mynsiem ha ki ïa kata ka jingtrei shitom ka jong ki ba ka Seng ka kwah ban ithuh bad ba kin longkita ki atiar jong ka Jaitbynriew
“Ki khun samla kila kiew ha ka jingpule bad hangno ngin ong ba ngi dang sahdien ha ka pule puthi hynrei ka jingsahdien kadei na secretariat namar kam shymla don ïa ki polisi kiba biang ban pynbha ïa ka pule puthi bad na liang jong ka Seng kan ïai buddien bad kan tied jingkhang ïa ka sorkar n aka bynta ka pule puthi.
U la ong ruh ba jingïaid lynti ka long kaba la jlan kat haduh b aka Mawshynrut Circle kan ïoh ïa ka ophis treikam kaba pura bad u la kyntu ruh ïa ki nongïalam ka KSU Mawshynrut Circle ba kin long hapoh jong ki Dorbar Shnong ban ïatreilang ha kiba bun ki liang.
