SHILLONG:
U Chief Executive Member (CEM) ka Khasi Hills Autonomous Distric Council (KHADC), u Bah Pyniaid Sing Syiem, ha ka 23 tarik Jylliew u la ïathuh ba ka Executive Member bathymmai, ynda la kut ka dorbar Lyiur ka KHADC kan sa hiar jurip ïa ki shnong ki ba hapoh hapoh ka jingpeit jong ka, ki don hapoh khappud bad ka jylla Assam.
Ha ba kren sha ki ladpathai khubor u Bah Pyniaid u la ong ba ka Executive Committee thymmai ha ka KHADC kan shim khia bha ha ka ba ïadei bad ka mat khappud, halor ka jingïakynduh jingeh jong ki paidbah ha ki shnong bapher bapher, kiba hap hapoh u pud u sam ka KHADC khamtam ha ka ba ïadei bad ka synshar khadar.
“Na ka liang ka EC thymmai ka don ka jingthmu ba tang shu dep ka dorbar lyuir, ngin hiar sha kitei ki shnong ki ba shah pynwit ha ka leit ka wan, ha ba ki leit rep leit riang, ha ki kam khaïi bad kiwei kiwei ha kine ki shnong”, u la ong.
U la bynrap “Kino kino ki bor ki ba wan ban pynthud ïa ki shnong ha khappud, ngin sa tip shai yn da ngi la lah ban ïakynduh ïa ki nongshong shnong ban sngewthuh dei mano ba ju pynwit ïa ki namar haduh mynta ngim don jingtip shai hynrei da la don ka jingïakynduh ïa ki nongshong shnong ngin sa shai bha”.
U Bah Pyniaid u la ong shuh shuh, “Dang shen nga la ïoh ban ïakren hapoh ka dorbar halor ka jingshim khia ban ym ailad ïa ka sorkar na Assam ban wan ban pynshong syier ïa ki paidbah hapoh khappud, kumta nga kwah ban phah ïa ka khubor ka ba shai ba kane ka EC thymmai kan dei na ka bynta ban pynshngaiñ ïa ki nongshong shnong ha khappud”.
“Ha ka ba ïadei bad ka jingshah pynwit ki nongshong shnong ka Block –II, ki ba bun ki jingshah kynnoh ka dei beit pyrshah ïa ka Karbi Anglong District Council, na ka liang jong ngi ngi sngew khia bad nga la dep ban kren ruh bad u CEM ka Karbi –Anglong District Council (KADC) ba kam dei ban don kano kano ka jingpyndik ne pynthud ïa ki nongshong shnong ha ki thaiñ khappud. Halor kane ka bynta nga la ïoh ruh ban ïakren bad u MP ka Karbi Anglong u Horen Sing Bey, bad ngi kwah ba ki shnong ha ka Block II, kin shongsuk shnongsaiñ”.
Ha ba kylli halor ka jingdawa ki nongshong shnong ka Block II u la ong, “Ha ka ba ïadei ban wanrah biang ïa kine ki shnong ngam pat lah ban ong eiei namar ba ka jingpynbeit ïa u pud u sam sha kine ki thaiñ mynta ka dang sdang bad ka KHADC ka dei ki dkhot ka Regional Committee, yn da la poi ka jingïakren ha ka Regional Committee, ngin sa sngew thuh ïa ka jingthmu jong ka sorkar ha ka ba ïadei bad ka MoU ban pynbeit ïa u pud u sam”.
“Ka jingwan ka EC ba thymmai hapoh ka KHADC kan long ka jingshngaiñ ïa ki nongshong shnong ha ka thaiñ Block II, namar ba ngi long ki dkhot ha ka Regional Committee bad ngin hap ban ïashim bynta ha ka jingïalang bad ngi don ïa ka bynta ka ba khraw ha ka ba ïadei bad ka jingpynbeit ïa u pud u sam”, la bynrah u Bah Pyniaid.
