MAWKYRWAT:
Ki nongtrei jong ka Accredited Social Health Activist (ASHA) South West Khasi Hills District kiba hap hapoh ka lama jong ka Meghalaya ASHA Worker Union mynta ka sngi ka 14 tarik u Naiwieng da ki spah ngut ki la ïamih paidbah ban pynlong ïa ka rally kaba jai jai ha ryngkat da ki jingthoh ha ki placard ha kaba ïa kane ka jingïaïaid paidbah ki la sdang na Lad DC ophis Laitlawsang bad pynkut ha Dorbar Hall Mawkyrwat kane ka long kum ka dak ban pynpaw ïa ka jingbym hun halor ka jubab jong ka Myntri ka koit ka khiah ka Kong Ampareen Lyngdoh.
Ka kong Travelness Paliar kaba dei ka President jong ki ASHA South West Khasi Hills District ha shwa ban sdang ïa ka jingïaïaid paidbah ka la ong ba na ka liang ki ASHA South west Khasi Hills District katba ka Myntri ba dei peit ïa ka koit ka khiah bad ruh ïa ka sorkar jylla Meghalaya kam pat lah ban pynshai katkum ka jingdawa jong ki ASHA ngin nang pynjur ïa ka jingïakhih khlem buh por bad kan dang ïai bteng nangne shakhmat da kaba sangeh trei kam tad haduh ban da pynbna da kumwei pat.
Ka kong Sony Kharjana kaba dei ka Adviser jong ka Meghalaya ASHA Worker Union ka la byrthen jur ïa ka Kong Ampareen Lyngdoh ba ka klet ïa lade kum ka longkmie bad kaba dei ruh ka Minister jong ka koit ka khiah jong ka sorkar Meghalaya ba kam pyrkhat shuh ïa ki jingeh jong ki longkmie kiba dei ki ASHA, ka la ong ruh ba balei ka Sorkar jylla ka lah ban pynlut bai dawai iïa kita ki nongdih drok kiba kwah hi ban pynjot ïa la ka jong ka met haduh 9 klur tyngka hynrei kam lah pat ban pynbiang ïa ki ASHA kiba len lade naka bynta ki khun ki kti ha ki ba armet ha ki shnong ki thaw.
Ha kane ka sngi la ïoh ruh ka jingkyrshan na ki seng bhalang, ki riew rangbah bad ka jingkren na u Bah Polan Sohphoh uba dei u rangbah kur Rikhain lyngdoh Sakwang, u Bah Lambokstar Marweiñ u president ka HANM SWKHD, u Bah Arbok Kharjahrin u President ka HYC SWKHD na ka seng KSU u Bah Iengskhem Syiemlieh bad kiwei de ki riew rangbah bad na ki nongkitkam jong ki ASHA jong ka Thaiñ South West Khasi Hills District.