NONGSTOIN:
“Ka kamram jong ki doctor, ki nurse bad baroh ki nongtrei jong ka tnat ka koit ka khiah ka dei ka kam Blei, ban shakri ïa ki briew khamtam ïa kiba pang ba shitom bad kiba donkam shisha ïa ka jingïarap” la ong u Bah Macmillan Byrsat u Chairman Meghalaya State Law Commission bad u MLA jong ka Nongstoiñ ha ka 14 tarik Nohprah ha ka jingïalang plie ïa ka Mawlangkhar Sub Centre.
U Bah Byrsat u la ong ba kane ka Sub Centre kan ai ka jingshakri ïa kiba pang ba shitom ïa ki 10 tylli ki shnong kiba hap hapoh ka West Khasi Hills District.
U la kyntu ïa ki paidbah ba kin shim ïa ki kabu bad baroh ki jingmyntoi da ka jingdon jong kane ka Sub Center bad ban ïoh ïa baroh ki jingsumar na ka bynta ka koit ka khiah bad u la pynshlur ruh ïa ki longkmie ba kin leit kha ïa ki khyllung ha ki jaka sumar khnang ban ïoh ïa ka jingkoit jingkhiah bad u ka kyntu ruh ban kiar na ka jingshongkha khynnah.
Ha kane ka sngi u MLA ryngkat ki Doctor bad ki ophisar sorkar kila pynlong ruh ïa ka jingjurip ïa katei ka Sub-Centre kaba don ïa ka OPD section, Immunization, Labour Room and Post Natal.
Kiba la don lang ha katei ka jingïalang plie ïa katei ka Sub-Centre ki kynthup ïa u Deputy Commissioner ka WKHD u Bah Garod LSN Dykes, Dr. S.A. Lyngdoh DMHO, WKHD, u Dr. W. Sutnga ki nongtrei ka tnad ka koit ka khiah, ki Sordar shnong, bad ki nongshongshnong jong ki 10 tylli ki shnong kiba hap hapoh kane ka Sub Center ha Mawlangkhar.
