NONGSTOIN:
U symbud myntri rangbah ka jylla u Bah Prestone Tynsong mynta ka sngi, u la plie ïa u maw nongrim ban tei bad shna pynbha ïa ki surok shnong kiba don hapoh jong ka sor Nongstoiñ.
Ka jingtei bad shna pynbha ïa baroh ki surok shnong kiba don hapoh ka sor Nongstoiñ ki long haduh 20.915 KM ka jingjngai bad ïa kane la mang pisa da ka World Bank ïa kaba yn pyntrei lyngba ka Meghalaya Integrated Transport Project (MITP).
Ha kane kajuh ka sngi, u Symbud Myntri Rangbah ka Jylla u la plie paidbah noh ïa ka Inspection Bungalow (IB) ka tnad PWD kaba la tip ruh kum “U Sibsingh Syiem PWD Inspection Bungalow Nongstoiñ”.
Haba kren kum u kongsan ha kane ka sngi, u Bah Prestone u la ong ba ka roi ka par kaba kongsan tam ha ka jingim ka dei ka lynti ka siengkien namar khlem ka lynti ka siengkien kiba bit ba biang kan long lehnohei ban shna ka ïing ba bha bad ai rong ai rup namar tang shu mih shbar ka phyllaw iing kala long da kumwei pat ka dur ka dar
“Hadien ba la shimti ban ïalam ïa ka sorkar ha u 2018 ka mat jong ngi ka long ba ngi kwah ban wanrah ka jingkylla bad ka jingkylla kadei ban sdang na nongkyndong bad ka sorkar MDA hapoh ka jingïalam u Conrad K Sangma kum u Myntri Rangbah ngi la lah ban bei tyngka ha kaba ïadei bad ka jingshna ïa ki surok naduh u 2018 haduh mynta kaba ym duna shuh ïa ka 13 hajar klur tyngka” ong u Bah Prestone.
U la ong ba u la don ha ka sorkar naduh u 2003 haduh mynta hynrei kane ka sorkar kaba mynta kala thaw rekod hapoh ka tnad PWD bad u la ong ruh ba ha u snem 2023 ter ter ka jingbei pisa kan long lai shah bad saw shah ban ïa kane kaba mynta.
“T.29 klur kam dei ka kamkai hynrei kaba sngewsih ka long ba teng teng ki project ki sahkut tang na ka daw jong ka jingïahuri hura ka jingbymïasngewthuh bad ki trai jaka kumta nga kyntu ïa ki trai jaka bad ki shnong ki thaw ba kin ai kylluid ïa ka jaka khang ba kan ïaid beit ka kam kumba la thmu ban pyndep ha kapor ba biang” ong biang u Bah Prestone
U la kyntu ruh ïa u MLA bad ïa u Syiem Nongstoin ban jied lypa ïa ki kyrteng jong ki riew khaw ka District khnang ba yn ïoh ban pynsah nam ïa ki da kaba yn jer ruh ïa ki kyrteng ha kitei ki shurok ki ban sa shna.
Ha kane ka jingïalang plie mawnongrim bad plie ïa ka IB jong ka PWD la ïadon ryngkat lang ruh u Bah Macmillan Byrsat MLA ka Nongstoiñ, u Bah Gigur Myrthong MLA/MDC ka Mawshynrut, ki ophisar sorkar, ki riew rangbah jong ka thaiñ bad kiwei kiwei bad ha kane ka sngi u Bah Macmillan Byrsat MLA ka Nongstoiñ u la ïoh ruh ban aiti ïa ka kali kit ñiut sha u DC ka WKHD u ba long ruh u chairman ka Nongstoiñ Town Committee.
