SHILLONG:
U CEM ka KHADC u Bah Pyniaid Sing Syiem u la ïathuh ba ha ka jingïalang jong ka Executive Committee ka Council kaba la long myn ha ka 13 tarik Nohprah, 2023 ka la shim ïa ka rai ban pyntrei kam ïa ka Welfare Skim na ka bynta ki nongtrei ka KHADC kiba don 800 ngut.
Haba kren sha ki lad pathai khubor u Bah Pyniaid u la ong ba na ka liang ka EC kan mang ïa ka jingïarap ban long kum ka Medical Allowance na ka bynta ki nongtrei jong ka KHADC.
“La 70 snem ka jingdon jong ka District Council, bad haba phai sha ki jingdonkam ki nongtrei ka Council kam don ka ka jingïarap pisa haba ki pang ki shitom kane ka buh jingeh ïa ki nongtrei jong ka,” u la ong.
U la bynrap “Ha ka jingwan ka EC mynta tang san bnai hangne ngi la ïohi ba don ki nongtrei kiba la hap ban mad ka jingeh haba ki mad ïa ka jingpang jingshitom khamtam ka jingshitom kaba hap ban sumar shabar ka jylla”.
U Bah Pynïaid u la ong ba ka District Council, kan ïatrei lang bad ka SBI Bank ka ban ai da ka Special Group Insurance Medical Package ka ban long ka jingïarap ïa ki nongtrei jong ngi .
U la bynrap, “kane ka premium yn bei da ka EC ka KHADC bad ka jingmang kan long kat kum ka rta ki nongtrei, ka ban long T. 3 Lak haduh T. 7 Lak shisnem kat kum ka rta”.
