SHILLONG:
Ka myntri jong ka tnad Aiñ, ka Kong Ampareen Lyngdoh, ha ka 5 tarik Naitung, ka la ong ba ka Meghalaya ka dei ka jylla kaba don shibun ki jinglong kyrpang, ba la ïada kyrpang da ka Sixth Schedule, bad ka sorkar jylla da leilei kan ym ailad ïa ka Uniform Civil Code (UCC) ba kan treikam hangne.
“Ngi don ki jinglong kyrpang katkum ka constitution, bad ngin pynthikna ba ki aiñ shimet jong ngi ymdei ban shah ktah. Ngi long kiba kyrpang, ngi dei ka jaitbynriew ba shim jait na ka kmie, bad kine baroh ki don hapoh ka constitution, bad nga thikna ba kiwei pat ki jylla ka thaiñ shatei lammihngi ki don kajuh ka jingïohi”, la ïathuh ka Kong Apareen.
Haba kren ba ka UCC ka dei ka aiñ kaba khraw kaba ktah ïa kiba bun ki mat, ka la ong ba shisien ba ki la ïoh da ka jingthoh ha ka jylla, kin sa ïakren halor kane.
Ka la ïathuh ruh ba haduh mynta ka jylla kam pat ïoh jingthoh eiei na ka sorkar pdeng haduh mynta.
Haba kylli lada ka sorkar kan ïakren ban pynlait na ka UCC, ka Kong Ampareen ka la ong ba kam long kaba dei ban shu ïarai kulmar khlem pat da sngewthuh shai halor kane ka mat.
“Balei ngim pan ban pynlait haba kane ka mat kam pat dei kaba la pyntreikam? Ai shwa ba kan long aiñ, hangta ngin sa ïakren pat. Ngim pat tip kaei kaba ki kwah ban buh hapoh ka UCC, ka dei ka policy kaba khraw, ka aiñ shimet ka dei kaba khraw. Ka kynthup ïa ki jinglong tynrai, ka rukom im, ka niam bad ka jingngeit niam bad kiwei pat ki mat. Ban wanrah ïa ka aiñ kyrpang kaba ïadei dur tang ïa kawei ka jaitbynriew ka dei kaba bakla ha kum ka ri India”, ka la ong.
Ka la ong ba ka India ka don 28 tylli ki jylla, baroh ki ïadonlang kaba dei ka jingitynnad jong ka ri synshar paidbah, bad ymdei ban ailad ïa kano kano ka rai, hynrei kumba ka long mynta ym pat ïoh jingthoh eiei halor kane.
