MUKROH:
U rangbah shnong ka Mukroh, Bah Hamboi Sumer u la sei da ka map jong ka shnong kaba la ïoh naduh u snem 1968 na ka District Council Jowai, Autonomous District Jowai jong ka United Khasi-Jaintia Hills Autonomous District kaba kdew ïa u pud jong ka shnong kaba kut shaduh ka kyntoit Moothasingkwai kaba jngai kumba 8-9 km eiei na Mukroh.
Ha ka jingleit wad bniah jong ki nonglum khubor ïa ka sdang ka kut, ban kylli pyrthew ïa ka jaka ka puta bad u pud u sam jong ka Assam bad Meghalaya ha ka shnong Mukroh, ki nonglum khubor u Kynjatshai ki la hiar hi shaduh katei ka Forest Camp kaba don ha Khliehsnarew kaba jngai kumba 1-2 km eiei na shnong, bad la ïohi ruh ïa ka jingshah thang jong katei ka camp.
Haba kylli, ka shnong ka la ïathuh ba ka Assam ka la wan klun bad thaw camp ha katei ka jaka naduh u 2003 bad naduh kata ka por, lada ki nongshong shnong ki leit sha ki bri kiba don sharum na katei ka camp ha Umlaphiah, ki pulit Assam ki ju leh baheh ki shim pisa lada ki lap ïa kiba kit khaw, kit kba halor ka nongrim ba ki kam beit ba ki wan tuh na ka jaka kaba la hap hapoh ka Assam.
Lah ban kdew ba kiba bun na ki nongshong shnong jong ka Mukroh wat lada ki don ïa ki pata jaka bad ki kot ki sla kiba biang ban pynshisha ba ki long trai ïa ki jaka ki bri kiba don sharum na ka shnong, hynrei namar ba u Assam u la leh donbor kim lah shuh wat ban leit pom tang dieng ïap na ki khlaw kiba dei hi ka markynti lajong.
Ha kane ka sngi la mih lang ryngkat u Secretary shnong ka Mukroh lem bad ki katto katne ngut ki rangbah jong ka shnong kiba la pynshai ïa ka jaka bad ka jinglong jingman ha Mukroh.
Haba ïakren bad u nonglum khubor, ki la ïathuh ba la bunsien ki la leit ban pan jingiarap na ka sorkar jylla ban bishar lem ïa ka jinglong jingman ha katei ka shnong hynrei ym don ba pushe lane ban leh eiei.
Haba kylli haduh katno ka jingjngai shaduh ki shnong kiba hap hapoh ka Block-1 ki la ïathuh ba ka don kumba 11-12 km, hynrei u Assam u la wan ban tur shaduh shaneng wat haduh Lumpalang ka jaka kaba jia ka jingïakulmar, ka Assam ka la wan kam trai.
U secretary shnong u la kam ba wat kito ki khlaw ba la klun noh da ka Forest Assam, kadei ka khlaw jong ki nongshong shnong bad ki don ruh ïa ki kot ki sla ban pynshisha, “Ngi leit pom dieng, leit ot phlang na jaka lade hynrei ngi shah leh heh shah khrong pisa,” u la ong.
Uwei na ki rangbah jong ka shnong, u la ong ba ha u 2002 ka shnong ka la pyrshang ban beh ïa kine ki pulit Assam na katei ka jaka hashuwa ba kin shna camp, hynrei namar ka jingleh bor ka la don ruh ka jingïap ha kato ka por haduh 6 ngut na ka shnong Mukroh, bad ha u 2004 ka Assam da ka jingleh donbor ka la ïoh ban kam trai syndon ïa katei ka jaka bad la pynïeng ïa ka Camp.
U la ong ba na ka por sha ka por ka shnong ka la leit ban pynsngew sha ka sorkar jylla halor kane, hynrei ym shym don ba leh eiei ban pynbeit pynbiang.
