U Myntri Rangbah duh ka jylla u Conrad K sangma ha ka sngi ba ar jong ka taiew ula plie paidbah noh ïa ka Ophis treikam jong ka tnad Agriculture & Farmers Welfare ka Krishi Vigyan Kendra (KVK) kaba don ha ka shnong Nongshillong kaba hap ruh hapoh u pud u sam jong ka Eastern West khasi Hills District bad ha kane ka sngi la wan ban sakhi lang u Myntri ka tnad Water Resources u bah H.Brolding Nongsiej,U Deputy Commissioner ka Eastern West Khasi Hills District u bah Wilfred Nongsiej,U Acting Director ka ATARI Zone Umiam u Dr A.K Singha,ki Ophisar na ki tnad treikam bapher bapher, ki nongrep jong ka thaiñ bad kiwei.
Ka jingplie paidbah ïa kane ka Ophis treikam ka long kum shi bynta ban ai ïa ki jinghikai bad ban pyni ruh ïa ki buit bad ki rukom treikam katkum ka stad saian sha ki nongrep jong kane ka thaiñ khnang ban kyntiew ïa ki kam rep bad ïa ki kam ri jing ri hapoh ka jylla.
U Myntri Rangbah haba ai jingkren ula ong ba ki nongrep ki dei kiba nyngkong eh kiba ka sorkar ka khmih bha bad “ka sorkar ka la ïaleh ban pynkiew ïa ka ïoh ka kot jong ki nongrep ym dei tang ar shah hynrei lada lah haduh laishah ruh “bad ban poi sha kane ka thong ka donkam ïa ki nongrep ba kin tip shaphang ka jingpyndonkam ïa ki buit jong ka stad saian bad kiwei pat ki jait tiar jong ka juk kaba mynta khnang ba kan kyntiew ïa ka ïoh ka kot jong ki nongrep ha ka jylla .
Ula ong ruh ba ka sorkar MDA ha kine ki saw snem shiteng kiba la dep ka la pynlong ïa bun jait ki prokram miasion hapoh ka jylla kum ka Jackfruit Mission ka ,ka Mushroom Mission ,ka Ginger Mission bad kiwei kiwei bad ki la pynlut ruh ïa ka pisa ha kiba bun jait ki tiar jong ka juk stad saian ki ba ki nongrep kim pat ju pyndonkam ha ka kam rep ka jong ki bad ula ong ba da kaba sam ïa kum kine ki tiar kan ïarap bad pynshlur ïa ki nongrep jong ka jylla ba kin trei bha ban pynroi ïa ka kam rep.
U MR ula ong ruh ba ka jingplie ïa kane ka Ophis treikam ka long ban kyntiew ïa ki nongrep bad ban pyntikna ruh ba ki nongrep ki ïoh ïa ka jinghikai kaba biang bha ba kin ïoh ruh ïa ka jingbatai shaphang ki jingpang kiba pher bapher kiba lah ban wanrah da ka mei mariang bad kiwei pat.
Shuh shuh ula kyntu ruh ïa ki nongtrei jong kane ka ophis ba kidei ban trei bha ïa ka kam bad ban peit bha ïa ki jaka kiba pher na kawei sha kawei bad kidei ban trei ruh ïa ka kam ym ba kadei ka kam jong ki hynrei ba kin peit ïa ka kum ka thong bad ban don ruh ïa ka jingmut jingpyrkhat ban ïatreilang ban kyntiew ïa ki nongrep khnang ba ma ki ruh kin ïarap ban kyntiew ïa ka ïoh ka kot jong ka jylla bad ïa ka ri. Kiwei pat kiba la kren ha kane ka jingïalang ki kynthup ia u Myntri ka tnad Water Resources u bah H.B Nongsiej u Deputy Commissioner Ka Eastern West u bah W.Nongsiej,U Acting Director ka ATARI Zone Umiam u Dr A.K Singha,ka Joint Director RTTI Ka tnad Agriculture & Farmers Welfare ka kong D C.Sohtun bad u bah W. Syiemlieh District Horticulture Officer West Khasi Hills.
