SHILLONG:
Ha ka jingïalang jong ki kynhun myntri jong ka sorkar jylla, ha ka 6 tarik Jylliew, la pdiang ïa ki katto katne tylli ki jingtyrwa ki ba la wanrah ha kane ka jingïalang, kynthup ïa ka Office Memorandum na ka bynta ka Reservation Roster bad ban thaw ïa ka Search Committee ka ban khlieh da ki laingut ki dkhot ki ban jied ïa ki experts ban long kum ki dkhot jong ka Expert Committee na ka bynta ban pynbeit ïa ka Reservation Policy.
Ha ba kren sha ki lad pathai khubor halor kine ki rai ba la shim ha ka jingïalang jong ki kynhun myntri, u Myntri Rangbah ka jylla u Conrad K Sangma u la ïathuh ba ha kane ka jingïalang la pdiang ïa ka jingpynkylla, ïa ki Rules of Executive Business ban kynthup sha ki tnad Planning Investment Promotion and Sustainable Development, ka ba ha ki por ba la dep la ju tip kum ka tnad Planning.
“Ïa ka tnad Planing la pynthymmai ïa ka kyrteng sha ka Tnad Planning, Investment, Promotion and Sustainable Development bad ban pynïoh ïa ka jingithuh ïa kane, la hap ban pdiang ïa kane ka kyndon, ka ba la pdiang mynta ka sngi ha ka jingïalang ki kynhun myntri” u la ong.
Mynta ka sngi ka kynhun myntri ka la pdiang ruh ïa ka jingtyrwa ban thaw ïa ka Directorate of Forensic Sciences, ka ban hap hapoh ka jingpeit jong ka tnad Home hynrei kam dei hapoh ka Police Headquarter, ïa kane la ïathuh da u Myntri Rangbah ka jylla.
“Ha ka jylla ka don ka Forensic Sciences Cell, ka ba hap hapoh ka Police Headquater, bad katkum ka jingtyrwa na ka Human Right Commission, kane ka tnad ka dei ban thaw ka ban long kaba laitluid bad kan don hapoh ka jingpeit jong ka tnad Home bad ka sorkar kan dang pynkhlaiñ shuh shuh ruh ïa ki kor ki bor ha ka Forensic bad ïa kane ki kynhun myntri ki la pdiang mynta ka sngi”, u la bynrap.
Ha ka jingïalang jong ki kynhun myntri kaba la long mynta ka sngi la pdiang, ruh ban kynthup ïa u Secretary of the Meghalaya State Public Service Delivery Commission ha ka thup kyrteng jong ka Heads of Departments hapoh ka Meghalaya Fundamental Rules (FR) bad ka Subsidiary Rules (SR) 1984.
“Kane ka long ba u Secretary jong ka Commission ban don ka bor ka ba donkam ka ban lah ban ai jingbit na ka bynta ki jingpynlut, ha ka kyrdan jong ki bad kin ym donkam ban wan sha ka sorkar na ka bynta ban ïoh jingbit”, u la bynrap.
U myntri rangbah u la ïathuh ruh ba ki kynhun myntri jong ka sorkar jylla ki la ai ka jingmynjur na ka bynta, ban thung ïa u Chief Secretary bad uwei u dkhot na ka tnad Aiñ bad uwei u dkhot na ka tnad Personnel ki la thung na ka bynta ka Search Committee, na ka bynta ban thung ïa ki experts na ka bynta ban long ki dkhot ka Expert Committee.
U la bynrap shuh shuh, “La ai jingmut ba ha kane ka Expert Committee dei ban kynthup ïa ki san ngut ki dkhot ki ba la tbit ha la ka jong ka kyrdan katkum ba la pynmih ha ka notification”.
Ka kynhun myntri mynta ka sngi ka la shim ruh ïa ka rai ban pdiang ïa ka Office Memorandum na ka bynta ka Reservation Roster ka ba la wanrah ïa ka jingkylla, khnang ba ka ne ka Reservation Roster OM kan shai bad da kane ka jingpynkylla ïa ka ne ka OM, ka jingthungkam kan sdang noh shen.
Ha kane ka jingïalang la wanrah ruh ïa ka jingbatai shai halor ka jingthmu ban pyntreikam ïa ka CM Solar Mission, ka rukom pynmih bording ka bym ktah ïa ka mariang bad ka sorkar kan ïarap katto katne percentage sha ki longïing bad ki katto katne ki institutional units bad ka sorkar kan pynbiang ïa ki kor ki bor ki ba donkam. U la bynrap ruh “Ïa ka CM Solar Mission la khmih lynti ban pynurlong noh ha u bnai ban wan”.
