SHILLONG:
U Saleng Sangma uba dei u nongïalam jong ka seng Congress u la ai jingmut ba ka por ka la dei ban pynkut noh ka jingai bhah ha ka Reservation Policy ïa kito ki longiing kiba lah ïoh jingmyntoi teng shisien na kane ka bhah, hynrei ban pynleit jingmut bad ban ailad teng noh ïa kiwei pat ki longiing ki bym pat ïoh jingmyntoi eiei na kane.
Haba kren bad ki nongthoh khubor, na ka liang u Saleng u la ong ba haba kren shaphang kane ka mat dei ban peit lut ïa baroh kiba don ha ka jylla, naduh kito ki bym pat ïoh jingmyntoi teng wat tang shisien ruh na kane ka bhah ba la mang kyrpang bad ruh kumjuh kito kiba wan na ka longiing longsem kaba kham duna ha ka ïoh ka kot.
Na ka liang jong u Saleng u la ong ba u la ai jingmut ban buh da ka Commission, “Namar kane kan long kaba kham bha. Lada phi buh da ka Commission ki lah ban poi sha baroh ki paidbah ki bym don ka sur ban pynpaw bad sha kito ki bym pat ïoh jingmyntoi”.
U la ong ruh ba lada don kane kan long kaba suk namar lah ruh ban sngewthuh ïa ka ïoh ka kot jong ki paidbah, namar haba kren ïa kane u la ong ba kam dei tang na ka bynta kawei ne ar tylli ki jaitbynriew, hynrei hap kren ïa baroh kiba don ha ka jylla.
U la ong ruh ba ka jingmut hi ka Reservation ka long na ka bynta kito ki bym pat ïoh jingmyntoi bad kiba kham duna kiba don ha ka imlang sahlang.
“Ka Reservation ka dei na ka bynta kaei? Ka Reservation ka dei na ka bynta kito ki bym pat ïoh jingmyntoi bad kiba kham duna ha ka imlang sahlang, khnang ban lah ban kyntiew lang ïa ki. Kane ka dei ka jingmut jong ka”, la ong u Saleng bad u la ong ruh ba ka long kaba bha ban shim ïa ka jingai jingmut jong baroh.
Na ka liang u Saleng u la pynshai ruh ba lada thaw da ka Commission kan long ba kan kner ka kti sha kito ki bym ïoh jingïarap, ka lah ruh ban sngewthuh kino kiba kham duna ha ka imlang sahlang ha kaba ïadei bad ka ïoh ka kot bad katno ngut kiba la ïoh jingmyntoi naduh ka sngi ba nyngkong bad ruh ïohdon kiba dang ïai bteng ban ïoh myntoi na kane ka Reservation haduh mynta mynne tang na kajuh ka longiing.
“Lada nga ïoh ïa ka Engineer lane Doctor Quota na ka Reservation Policy, la kumno kumno ïa ka longiing jong ki ymdei shuh ban dang ai ïa ka Reservation, namar ka jingmut hi ka long ban ïakyntiew lang”, la ong shuh shuh u Saleng bad ong ruh ba namar ba kane ka longiing ka lah kiew, ka lah ban ïakhun bad kiwei pat ki bym donkam ïa ka Reservation.
Na ka liang u Saleng u la pynpaw ruh ba donkam ban wanrah ïa ki kompeni bapher bapher ha ka jylla lajong khnang ba ki samla ynda haba ki lahdep ïa ki jingpule kim donkam ban mih na la ka jong ka jylla ban wad kam.
“Baroh ki samla kiba lah pyndep ïa ka jingpule haba ki trei shabar ki trei bad ki kompeni shimet. Balei ngim wanrah noh ïa kine ki kompeni ha ka jylla jong ngi?”, la ong u Saleng.
Na ka liang u Saleng u la pynpaw ruh ka jingsngewkhia shaphang ki samla na ka jylla ha kaba u la ong, “Kin long tang kum ki nongwei shabar ka jylla lajong”, bad ong ba donkam ban thaw bun ki lad ki lynti ban ai kam ïa ki samla.
