SHILLONG:
Ka jingïapynpaw jong ki nongïalam seng saiñpyrthei halor ka Reservation Policy kaba la pynkhih da ka seng saiñpyrthei, ka Voice of the People Party ka don la ka jong ka jong ka jingsngew jong ki bad kiba bun hi na kine ki nongïalam ki pynpaw ba kim kwah ban ktah ei ei halor kane ka mat hynrei ban long phikir namar kane ka mat ka long kaba ktah ïa ka jylla hi baroh kawei bad ha kaba ïadei bad kane ruh, u nongïalam jong ka BJP, uba dei ruh u MLA barim ka Mawsynram Konstitwensi u Bah Himalaya Shangpliang haba kren halor kane, u la ong ba kane ka dei ban pynmyntoi lang ïa baroh bad u shaniah ruh ha ka rai jong ka sorkar.
U Bah Himalaya u la pynpaw ruh haba kren bad ki nongthoh khubor ba kum ka seng ka la don la ka jong ka jingai jingmut sha ka sorkar ha kaba ïadei bad kane, hynrei mynta kim pat lah ban kren ei ei namar ïa kane kin sa ïakren beit ha ka jingïalang ba la pynbeit na ka bynta baroh ki seng sainpyrthei.
U la pynpaw ruh ïa ka jingsngew shimet jong u ba u kwah ba kane kan pynmyntoi ïa baroh ki nongshong shnong ha ka jylla la ki dei u Khasi ne Garo bad kane kam dei hi kaba thymmai hynrei kaba la don naduh u snem 1972.
“Lada ka don hangno hangno ngi dei ban ïashong ban ïapynbeit lang ban ïa myntoi lang ki khun samla jong ngi ban ïohkam ïohjam”.
“Ymdei ba nga ong ban khate nawei pynmyntoi shawei, hynrei ngi kwah ba ka sorkar kan ai ïa ka rai, kaba ka High Court ka la aiti ha ka sorkar ban ai ïa kata ka rai bad lada ka sorkar kam lah, dei ban rah shapoh ka dorbar thawaiñ katkum ka High Court”, la ong u Bah Himalaya.
U Bah Himalaya u la ong ruh ba ka shong ha ka jingstad jong ka sorkar bad kum ka seng ka ailad ha ka sorkar ba kan pyrkhat bha bad ong ruh ba kane ka sorkar kaba mynta kam dei ka sorkar kaba ñiewbeiñ ne leh shiliang khmat.
U la ong ruh ba u ngeit ba ka jingïalang jong baroh ki seng sainpyrthei bad ruh bad ki sengbhalang, ha kaba kin ïamir jingmut lang, kan wanrah ïa ka jingbha jong ka lawei ki khun samla ban dang wan.
