SHILLONG:
U nongïalam ki nonghikai kontrak, u Bah Birbor Rangtem, mynta ka sngi ka 27 tarik Jymmang u la phah khubor sha u Myntri Rangbah ka jylla da ka ktien Garo ban kyntu ïa u ba un phai biang ban pynbeit ïa ka reservation policy.
Haba kren sha ki lad pathai khubor hadien ka jingleit ïakynduh ïa u Bah Ardent, u Bah Birbor u la ong ba ki la wan khnang ban ai mynsiem bad ban ai khublei kyrpang ïa u Bah Ardent uba la sei ïa kane ka mat kaba donkam ïa ka jylla.
U Bah Birbor u la ong ruh ba la don kiba la kren halor kane ka mat naduh mynshwa, naduh ki sengbhalang bad kiwei kiwei. U la pynkynmaw ruh ba u Bah Paul Lyngdoh ha ka snem 2001 u la dawa ba ka bhah kam bhah jam ka dei ban long 60 la 40, kata 60 na ka bynta ki Khasi-Jaiñtia bad 40 na ka bynta ki Garo, ïa kaba la pynmih ha ka kot khubor jong u bnai Naitung, hynrei mynta ba u la long Myntri, shi kyntien ruh um pynpaw shuh.
U la ong ruh ba tang ar bnai mynshwa, ki don ki seng saiñ pyrthei khamtam ka HSPDP lyngba ki manifesto jong ki, ki la thoh shai ba lada ki wan ha ka bor kin pynthymmai ïa ka reservation policy, bad u la buh ka jingkylli kum ki nonghikai kontrak ba hato ka manifesto jong ki ka dei ka “agenda” ne ka “propaganda”?
U la ong ruh ba ka reservation policy ka long kum ka tala ba la sarang kaba don ha ka kti u Myntri Rangbah u Conrad K Sangma ïa kaba u Bah Ardent u pyrshang ban pynthymmai, hynrei ki 31 ngut ki MLA Khasi kim treh.
