RI BHOI:
U Deputy Commissioner ka Ri Bhoi district, u Arpit Upadhyaya, myn ha ka 14 tarik Naiwieng, u la pyntip ba ka district ka la dep lut ban pynkhreh ban pynlong ïa ka tamasa Cherry Blossom Festival 2023, lem bad ka jingpynbiang na ka bynta kane ka tamasa kaba khraw ka ban neh 3 sngi kynthih ha Madan Kurkalang, Bhoirymbong, ka ban sdang naduh ka 17 tarik Naiwieng bad kan kut ha ka 19 tarik Naiwieng.
Haba kren sha ki nonglum khubor ha ka nongbah, u DC u la ong ba la pynbiang ruh ïa ki nongpahara na ka bynta ban peit ban khmih ïa ka jaka rung jaka mih bad la buh ruh ïa ki nongpahara shnong ha ki jaka pynïeng kali khnang ba ki paidbah kin lait na kino kino ki jingeh bad kan lait ruh na ka jingdheng ki kali.
Haba kren halor ka seng Joint Action Committee (JAC) kaba pyrshah ïa katei ka tamasa, u Superintendent of Police (SP), u Giri Prasad u la pyntip ba ki tnad ba dei peit bad ki shnong ki la leit ban ïa kynduh ïa ki dkhot jong ka seng JAC bad ki la pynsngewthuh bad pynshai ïa ki ïa ka por ba kane ka tamasa kan sdang hadien ba la kut ka jinglehniam ne ka jingshakri Blei.
