PATHARKHMAH:
Ha kawei ka jingjia, ki katto katne ngut ki briew ki la ïoh kem ïa kawei ka dohkha kaba heh hynrei kaba sngewsih ka long ba ym shym la khwai ïa ka hynrei la ong ba la pyndonkam da ka bih.
Ha ka video ba la saphriang, la ïohi ïa uwei u samla uba dang kit ïa kawei ka dohkha tmaiñ kaba khia kumba 80 kilo eiei (katkum ka video). Ka jingkhia bad jingheh kane ka dohkha ka la mar ïa ryngkat bad u briew uba kit ïa ka.
Ki tyllong khubor ki ïathuh ba kane ka jingjia kaba la jia ha ka 11 tarik Jymmang, ka la jia ha wah Khri kaba hap hapoh ka Patharkhmah Police Station ha ka phang sepngi jong ka Ri Bhoi.
Nalor ka dohkha tmaiñ kaba khia, ka bym da shem koit ha ki wah ha Ri Bhoi, la ïoh kem ruh ïa kiwei ki dohkha kiba kham rit kiba ïasyriem da ki katto katne ngut ki briew.
La ïathuh ruh ba katto katne ngut ki briew na ki shnong bapher bapher na ka phang sepngi jong ka Ri Bhoi, la kynnoh ba ki la ber bih ïa ka wah da kaba pyndonkam ïa ka bih na kane ka thaiñ kaba ki khot Kharu ban pynïap ïa ki dohkha.
Kam dei ka rukom khwai dohkha ba ju leh ryntih ki paidbah, hynrei ki khwai da kaba pyndonkam da ka bih ba mih na ka mariang kum na ki dieng ki siej ne ki sla.
La ïoh jingtip ba mynshisngi, ki pulit ki la leit sha ka wah bad ki la ïoh bat lai song ka bih kharu, katba hynnin ka sngi pat ha ka jingbym don ki pulit, ka kynhun ki samla ki la leit sha ka wah bad ki la ber bih ïa kane ka wah.
Haba buddien halor ka jingjia, na ka liang ki nognshong shong ki la ïathuh shaphang kane ka jingjia sha ki pulit. Kato katne ngut ki briew ïa kaba la saphriang ki dur lyngba ka rynsan social media, ki la shah phah wan mih ha Patharkhmah Police Station ha ka 12 tarik Jymmang.
“La shah khot ïa kine ki briew sha thanad bad ka jingtohkit ka dang ïaid shakhmat,” la ïathuh ki pulit.
