SHILLONG:
U Bah Metbah Lyngdoh, MLA ka Mairang Konstitwensi, u ba long ruh u President ka United Democratic Party (UDP), u la ong ba ka rynsan kaba biang tam ban ïatai ïa ka Reservation Policy bad ka Roster System ka long ha ka Sorkar ym hapoh ïingdorbar thawaiñ ka jylla.
Haba ïa kren bad ki ladpathai khubor u Bah Metbah u la ong ba ha ka sngi ba u Myntri Rangbah ka jylla u Conrad K Sangma u la wan phai sha ka jylla, u la leit ban ïakynduh ïa u ban ïakren halor ka mat Reservation bad ka Roster.
“Nga la dep ban ïakren bad u Myntri Rangbah ka jylla, nga la kdew ba kane ka dei ka mat ka ban lah ban ktah ïa ki ar jaitbynriew bad donkam ïa ka jingïasyllok ka ba bniah bha na ka bynta ban don ka jingmyntoi ïa baroh ki jaitbynriew ki ba don ha ka jylla”, u la ong.
U la bynrap “Kumba nga la kdew ba ka dei ka mat ka ba lah ban ktah bad ngim lah ban shu ong ba ngi lah ïa kane katei hynrei ka donkam ban don ka jingkitkhlieh bad ngi don hangne na ka bynta ka jingmyntoi ki paidbah ha ka jylla”.
U Bah Metbah u la bynrap shuh shuh, “Ngi donkam ban don ka jingkitkhlieh bad ngin hap ban pynthikna ba kano kano ka mat jingeh ka ba mih ngin lah ban pynbeit ha ka lynti ka ba dei”.
“Ngam kwah ban ïakren than halor kane ka mat bad kumba nga la ong ba ka dei ka mat ba lah ban ktah jur bad ngi donkam ïa ka jingïasyllok bha bad baroh ki nongdonbynta (stakeholder)”.
Ha ba kylli halor ka jingdawa ka VPP u la ong ba “Ngam don eiei ban ong halor ka jingdawa kiwei ki party, nga tip tang halor ka party lade bad dei na kane ka daw ba ngi dei ban ïakren ha ka rynsan ka ba dei”.
Haba kylli kaei ka rynsan ka ba biang tam ban ïatai, u la ong ba ka rynsan ka ba biang tam ban ïatai halor kine ki mat ka long ha ka sorkar lyngba u Myntri rangbah ka jylla.
“Ngi donkam ban ïasyllok bha shwa ïa kane ka mat, ka ba nyngkong ka long ban ïakren bha shwa bad u Myntri Rangbah. Ngi ruh ngi don ka jingsngewkhia bad u Myntri Rangbah ruh un sa shim khia ïa kane”, u la bynrap.
