SHILLONG:
U General Secretary ka UDP u Bah Jemino Mawthoh u la kren bynñiaw ba ka jingsam ïa ka skhim FOCUS+ ka dei na ka bynta ki nongrep hynrei kaba lyngngoh ka long ba wat ha sor ruh ki ïoh ïa kane ka skhim ki bym dei ki nongrep.
Lah ban kdew ba ka shkim FOCUS+ ka dei ka skhim na ka bynta ki nongrep ba kin lah ban seng lane ban pynheh ïa la ka kam lajong kaba ka sorkar ka ai man ki nongrep T.5000.
Haba kren sha ki katto katne ki lad pathai khubor ha ka 15 tarik Nohprah, u Bah Jemino u la ong ba ïoh lehse kane ka long tang ka jingpynbeij ïa ki paidbah tang ha ka por elekshon, ka long noh kumba thied ïa ki vote ki paidbah. U la ong ba lada ka sorkar MDA ka ai sha kito ki nongrep ha sor ka dei ka kamram ka sorkar ban pynshai ïa ki mat lane ki jingthmu hynrei ïoh ka long tang ka jingpynsep ei ïa ka pisa.
“Nga shong nga sah ha sor nga tip bha ïa ki jingeh kiba duk, kiba shitom ba wat tang ka ïingwai ki dang shitom ban ïoh te. Namar kane ka skhim la thmu ban ai ïa ki nongrep hynrei ha sor ki bym dei nongrep ruh ki ïoh, kumta ïoh ka long kumba pyndonkam bakla bad pynsepei ïa ka pisa”, la ong u Bah Jemino.
U Bah Jemino u la ong ba ka jingsam skhim ka sorkar ka long ka long kum ka buit thap ban khring ïa ka vote jong ki paidbah. U la ong ba kwah ban ïoh ka jingpynshai na u myntri rangbah ka jylla u Conrad K. Sangma namar ki don kiba ïoh ïa kane ka skhim wat tang ka jaka rep ruh kim don.
U Bah Jemino u la ong ba lada ka sorkar ka ai kano kano ka skhim lane kano kano ka jingïarap ka hap ban tip ruh ha kano ka rukom ba kato ka jingïarap kan ai jingmyntoi ïa kito kiba ïoh.
U Bah Jemino u la ong ba ha kane ka por elekshon ka jingmih kita ki briew ban thep Form ym ithuh ithaw shuh na ka liang jong u, um kwah ba kane ka skhim kan treikam ha ka lynti kabym dei hynrei lada pyntreikam ïa ka dei ban pyntrei ha ka lynti kaba dei khnang ba ki jingthmu jong kane ka skhim kan long kaba shai.
“Ngim kwah ba kane ka buit jong ka sorkar kan khring ïa ka Vote jong ki paidbah”, la ong u Bah Jemino.
U Bah Jemino u la ong ba ka don ha ki por mynshwa na ka liang ki sorkar kiba la leit noh, ka la don ka jingai pisa ïa ki briew T.5000 hajar bad ynda la dep ka elekshon la poi kot poi sla na ka Bank ba kito ki briew ki hap ban siew biang ïa kato ka pisa ba ki la ïoh ryngkat bad ka sut.
“Ngi kwah ban shai namar ngim kwah ban bun ïa u paidbah ha ka jingeh, ngim kwah ba ka sorkar kan ïalam bakla ïa ki”, la ong biang u Bah Jemino.
