MAIRANG:
Ka Mairang Vidyajyoti Inclusive Secondary School Sangshong ha ka 3 Tarik u bnai Nohprah 2022 ka la rakhe ïa ka sngi kyrpang na ka bynta kito kiba don ïa ka jingduna ha ki dkhot met ïa kaba la tip ruh kum ka ‘International Day for Person with Disability’ ha ka Prokram kaba la pynlong hapoh ka phyllaw jong ka ïingskul ha Sangshong.
Ha kane ka jingrakhe jong ka skul la wan ban sakhi lang da u joint Director ka MBOSE Shillong u bah M.Marbaniang kum u kongsan ryngkat ka jingïasynran jong u ADC ka Eastern West khasi Hills District u bah A.Nongbri kum u symbud kongsan, u bah K.Wahlang BMC,SSA Mairang, ka principal jong ka skul ki nonghikai lem bad ki khynnah pule.
Haba kren kum u kongsan ha kane ka Prokram u bah M.Marbaniang ula ong ba kane ka sngi ka dei ka sngi kaba baroh ki kynmaw bad ki rakhe burom ïa ki khynnah bad kiba la heh la san ruh kiba don pat hapdeng ki jingduna bad lyngba ka jingbuh ïa kane ka sngi ka 3 tarik u bnai Nohprah man ka snem ban rakhe ïa kane ka pynlong ruh ïa ka tnad pule puthi ban pyrkhat bha bad ban leh kyrpang na ka bynta kito kiba don jingduna ha ki dkhot met ki ban ïaleh ruh ïa ki eksamin bapher bapher bad lyngba kane ka jinglehbha ba kan long ka jingpynshlur bad ka ban sa ai ka jingiarap ïa kine ki khynnah.
U bah Marbaniang ula ai khublei ruh ïa ka Synod kaba dei ka nongkyrshan kaba la ïohi jngai ban ai mynsiem bad ïarap ïa ka skul watla ka dang dei tang ka skul kaba dang shu ïoh ïa ka jingithuh ha ka jylla hynrei ka thong ka jong ka KJP Synod Sepngi ka long ban ïarap ïa kine ki khynnah kiba don hapdeng ka jingduna ba kin nang iai kiew ha ki jingpule ki jong ki .
Katba u bah A . Nongbri ula kyntu ïa ki khynnah pule jong kane ka skul kiba bit ba biang ba kin ïarap lem ban kyrshan lang ïa kine kiba don jingduna khnang ba ka jaidbynriew kan roi kan kiew bad ula ong ruh ba lyngba ka jingiarap ïa kiwei ka kyntiew ïalade ruh ha ka jingim ba man ka sngi.
Shuh shuh ha kane ka sngi na ka liang ki nongpynïaid jong ka skul ki la ioh ruh ban pynkup burom ïa kito ki khynnah pule jong ka skul kiba la pass bha ha ka eksamin SSLC jong u snem 2021-2022 .
