SHILLONG:
Ka sorkar jylla kan nym khih halor ka jingkhot jong ka seng Voice of the People Party (VPP) ban shong kyllaiñ mongor halor ka reservation policy.
U Myntri rangbah ka jylla, u Conrad K Sangma ha ka 16 tarik Jymmang u la ong ba ki seng saiñ pyrthei ki lah ban ong katba ki kwah hynrei ka sorkar kan bud ïa ki kyndon bad kata ka dei kaei kaba ka sorkar ka leh, yn bud beit ïa ki kyndon ha man ka kynti.
Ka seng VPP kan sa pynlong ïa ka jingïakhih ban shong kyllaiñ mongor ha ka 17 tarik Jymmang halor ki jingdonkam ban pyngshngeh shuwa ïa ka jingthep kam thep jam hapoh ka jylla haduh ynda la lah ban pynbeit ïa ka reservation policy bad ka jingkhmih bniah halor jingpyntrei ïa ka roster system da ka kynhun ba la tbit.
“Ngi la ong ïa baroh ba ka sorkar ka dang pynkhreh ïa ka presentation kaba bniah bad mar syn ïohi ïa kane, nga thikna ba baroh kin sa shai ba ka long kumno, baroh ki jingartatien kin sa shai,” la ong u Myntri Rangbah ka jylla.
U Conrad Sangma u la ïathuh ba ka jingpyni ïa kane ka presentation hapdeng ka kynhun kan long ha ka janmiet jong ka 17 tarik Jymmang, ha kaba yn bud pat sa ka jingïalang jong baroh ki dkhot ba don bynta ha ka sorkar Meghalaya Democratic Alliance (MDA) ha ka 18 tarik Jymmang bad yn don ruh ka jingïalang jong baroh ki seng saiñ pyrthei ha ka 19 tarik Jymmang.
Shuh shuh, ka jingïakren bad ki kynhun bapher bapher ha ka imlang sahlang, ba kynthup ïa ki seng treimon sngewbha, ki nongïalam niam bad ki rangbah shnong, kan sa long la shem taïew namar ba kan sa kham shimpor ban pynbiang pynbit ban dup lah ban ïa donlang lut baroh , la ong u Conrad
Haba kdew ba ka presentation kan long kaban pynpeit mat, u myntri rangbah u la ong, “Bun ki paidbah kim sngewthuh kaei kata ka roster. Ka roster ka dei kaba kyllaiñ bha hynrei kaba suk ban sngewthuh. Kadei kaba kyllaiñ, hynrei shisien ba baroh kin ïohi ïa kane, kin sa sngewthuh kham shai”.
