SHILLONG:
Ka jingkyrduh kam kyrduh jam ki samla ka la pynkulmar jingmut bad ka la wanrah ïa ka jingbitar ïa ki khun samla hapoh ka jylla haduh ba ka la pyllong ïa ki ban shoh ban ïakhih na ka daw ka jingbym shimkhia ka sorkar jylla.
Uwei na ki samla na thaiñ Pynursla u samla Vicky Marbaniang haba kren sha ki lad pathai khubor mynta ka sngi u la kynnoh ba kane ka sorkar kam shym la suidñiew ïa ki samla hynrei ka shu thiang tang ki ktien kumba ai shyieng doh.
U la ong ka jingpang kaba heh tam hapoh ka jylla kadei jingbym biang ka kam ka jam jong ki nongshong shnong ka jylla.
“Kane ka sorkar kaba leh donbor, thombor, ñiom ïa ka jaitbynriew khamtam ki khun samla bad ngim lah ban pdiang namar haduh ba ki briew kiba nabar ruh kim salia shuh ban kren ban thad ïa ka jaitbynriew. Kane ka leit jia namar ba ka sorkar hi ka aibor, ka die tad ïa ki jaitbynriew jong ngi, ka Ri jong ngi bad pyrkhat tang ïalade bad kim don shuh ka jingisynei ïa ki paradoh para snam ruh”, la ong u Samla Vicky.
U Samla Vicky u la ong kaei kaei kaba jia ha ka sorkar lada kaba bha ne kaba sniew, ka jingsuk ne jingkulmar hap kynnoh beit ïa ka sorkar. U la ong ba kane ka sorkar kam treh ban leh ei ei halor kane ka jingeh bad na kane ka daw ka mih ka jingkulmar, ka mih ka jingbun jingmut jingpyrkhat bad kumjuh ka mih ka jingpynïap ïalade. U la ong hapoh jylla Meghalaya ka jingpynïap ïalade ka jur bha khamta kiba 30 snem shapoh. U la ong, “Balei ka leit jia kumne ka dawbah ka long ba kim biang ki kam ki jam, kim lah ban thied khaw ban rah sha ïing kmie, ïing khun”.
U la ong, “Ka jingbuh ïa ki Consultant da ki spah ngut hapoh ka Secretariat, ki ai jingmut aiu ïa ki myntri jong ngi, ki ai jingmut ban pynbeit ïa ki jingeh ki jong ngi hynrei kam don kum kata”.
U la pynkynmaw ïa ka jingkren jong u Symbud Myntri Rangbah ka jylla u Bah Prestone Tynsong ba lada don kano kano ka jingai jingmut ban ïaphylliew jingmut wan sha Secretariat hynrei kaba sngewsih ka long ba lada mut ban leit ïakynduh ïa kine ki myntri kiba shong ha Secretariat ym ju ïoh ïakynduh wat hadien da ki bnai ba ki la kyrpad ban ïakynduh. U la bynrap shuh shuh ba lada ïoh ïakynduh ruh la shu kut tang ha jingong “To, to”, kane ka rukom ïaid jong ki.
U la kyntu ïa baroh ki sengbhalang bapher bapher ba kin ïatylli kawei ban dawa ba kane ka sorkar kadei ban thawlad thaw lynti ïa ki samla ha ka ïohkam ïohjam.
