SHILLONG:
U chairman ka North East Students’ Organisation (NESO), u Bah Samuel Jyrwa, ha ka 28 tarik Jylliew u la kynnoh ba ka sorkar pdeng ka buhrieh kaei kaei sha lyndet haba ïadei bad ka mat jingjia ïa kulmar ha jylla Manipur.
U la kren ïa kane ha ka sngi ba la pynlong ïa ka jingthang mombati ha Khyndai Lad, Shillong ïa kaba la pynïaid da ka NESO ha ka janmiet jong ka 28 tarik Jylliew. Ha kane ka sngi la sakhi ïa ka jingwan ai jingkyrshan ki briew na ki seng bapher bapher ban pynpaw ïa ka jingïatylli bad jingsngewlem ïa ki paidbah ka jylla Manipur.
Haba kren sha ki lad pathai khubor hadien ka jingïathang mombati, u Bah Samuel u la ong, “Ngi sngew ba lada ka jingïakulmar kam sahngeh noh ha kane ka kynti, ka pyni ba ka sorkar Ri ka buhrieh ïa kaei kaei sha lyndet ban ailad ba ka jingïakulmar kan ïai bteng ha katei ka jylla. Ngim tip kaei kata ka mat kaba ki buhrieh hynrei ka lah ban don kaei kaei na shabar kaba long pyrshah ïa ka jingkwah jong ki paid riewlum jong ka North East India.”
Haba takraiñ ïa ka sorkar jylla bad kumjuh ka sorkar Ri ba kim shym la lah ban tehlakam ïa ka jingkulmar ba jia ha Manipur, na ka liang u Bah Samuel u la ong, “Baroh ar ki sorkar, kata ka sorkar jylla bad ka sorkar Ri ki la phiel ha kane ka jingïaleh pyrshah ïa ka jingsniew bad ka sorkar jong ka Ri India da ka jingbym pyntreikam da ka President’s Rule watla ka jylla Manipur ka don kumba 50 hajar tylli ki kynhun ïada Ri, ka long kaei kaei kaba la lah ban tehlakam ïa ka jingkulmar lada ki don jingmut shisha ban tehlakam ïa kane.”
U la pynpaw ka jingsngew kyndit ba u Myntri Rangbah duh ka Ri, u Narendra Modi u dang sngap jar-jar halor katei ka jingjia ha Manipur bad kumta u kyntu ïa u Myntri Rangbah duh ban kren noh halor kane ka jingjia bad ban shim noh ki rai kiba skhem ban pynsangeh noh mardor ïa ka jingïa kulmar ha ka jylla Manipur.
U Bah Samuel u la ïathuh ba ka seng kan ïakynduh ïa ki kynhun jong ka Meitei bad Kuki kum ka jingpyrshang ban wanrah ïa ka shongsuk shongsaiñ.
Ki dkhot ka NESO ki la pynlong ruh ïa ka jingthang mombati ha Tura Don Bosco Junior College ha ka 28 tarik Jylliew ban pynpaw ka jingïatylli bad jingsngewlem halor ka jingjia ha Manipur.
La ïashim bynta ha kane ka prokram da ki nongmihkhmat na ki sengbhalang bapher bapher na Garo Hills, kynthup ruh ïa ka Garo Student’s Union (GSU), ka Achik Holistic Awakening Movement (AHAM), bad u MDC na ka seng Bharatiya Janata Party (BJP) na Tura, u Bernard N Marak.
Kijuh ki jait prokram la pynlong da ruh da ka NESO ha kylleng ki jaka jong ka thaiñ shatei lammihngi kum ha ka jylla Nagaland, Assam, Tripura, Arunachal Pradesh, Mizoram bad Manipur.
