SHILLONG:
U Myntri Rangbah ka Jylla Meghalaya, u Conrad K Sangma ha ka 30 tarik Jylliew, u la kyntu biang ïa ka Sorkar Pdeng ba kan shim ïa ka sien jam ba mardor ban wanrah noh ïa ka shongsuk shnongsain ha ka jylla Manipur.
Haba ïakren sha ki ladpathai khubor, u Conrad u la ong “Ka jylla Manipur mynta ka don hapdeng ka jingeh ka ba khraw bha na ka jingmih ka jingïakulmar bad don shibun ki daw ki ba pynlong kumne, kumta ka Sorkar India kan hap ban wad ïa baroh ki lad ki lynti ba kan leh eiei noh mardor hi”.
U Conrad u la ong, “Ki nongshong shnong ha ka jylla Manipur ki mad ïa ka jingeh ka ba khraw la ki dei na kano kano ka jait bynriew ruh, ki nongshong shnong ki mad ïa ki jingeh bad ka la don ka jingshah ktah ïa ka jinglongbriew manbriew bad la donkam ban leh eiei ha kaban pynjai jai noh ïa ka jinglong jingman bad ban wanrah biang ïa ka jingsuk ha kane ka jylla”.
Lada phai sha ka jylla Manipur Mynta ka sngi la mih ka khubor ba u Myntri rangbah ka jylla Manipur u Biren Singh u lah ban aiti noh ïa ka shithi ban iehnoh ïa ka kam kum u Myntri rangbah ha khmat u Lat ka Jylla ha ka por 1 baje nohphai sngi, ha ïingsah u Lat ka Anusuya Uike.
Hynrei na ka liang u Myntri Rangbah ka jylla Manipur u la pynshai ba un nym iehnoh ïa ka kam kum u Myntri Rangbah ka Jylla Manipur hadien ka jingleit tur paidbah bad tawiar ki Longkmie ïa ka ïingsah jong u, kiba pynpaw ba ki dang kwah ba un dang bteng ïa ka jingsynshar ha ka Jylla.
U N Biren Singh Myntri Rangbah ka Manipur ha ka Twitteru la ong. Kane ka jingpynthikna kala mih hadien katto katne kynta bala saphriang ki dur jong ka shithi iehnohkam u N Biren Singh, kaba la tar lyngkhot lyngkhai.
Ka khubor ba ïoh ka ïathuh ba ïa kane ka shithi iehnohkam u Biren Singh la tar da kine ki longkmie kiba pyrshah ïa u ba un hiar shuki. Lah ïathuh ruh ba u Biren Singh u khlem ïoh kano kano ka jingbthah na ki nongïalam na Delhi ba un hiar shuki.
