SHILLONG:
Ka National Highway 06 ha Sunapur, East Jaiñtia Hills district kaba ju bna nam kum ka jaka ba ju jia bha ka jingtwa khyndew kaba la tip ruh kum ka “Narpuh landslide-prone area” kala shah ktah na ka jingtwa khyndew naduh ka miet jong ka 14 tarik Jylliew na ka daw ba jur eh u slap.
Ka jaka ba la shah ktah bha ka dei ka thliew rung ki kali kaba ju tip kum ka “Sunapur Tunnel” kaba poi hadien ba la lait ïaka wah Lukha.
Kajuh hi ka jaka ka la shah ktah na ka jingtwa u lum khyndew kaba la kah lynti ïa kane ka thliew rung ki kali ha ka step jong ka 14 tarik Jylliew bad ka dei haduh 2 baje nohphai sngi ba la lah ban weng ïa ka jingdheng kali na kane ka jaka.
Shuh shuh, katto katne kynta ba la lah ban pynkhuid ïa kane ka surok ka la don biang ka jingtwa khyndew ha ka janmiet jong kane hi ka sngi.
Ka jingtwa u lum ha kane ka jaka ka la ktah shi katdei eh ïa ki nongleit nongwan ki ba hap ïaid lyngba kane ka surok ba pynïasoh ïa ka shnong Barak Valley, Silchar, Mizoram, Tripura bad kumjuh ruh ka Manipur.
Haduh mynta ka jingleh shitom ban pynkhuid ïa kane ka surok National Highway Authority of India (NHAI) ka dang ïaid shakhmat.
Hapdeng kane ka jingjia, na ka liang ki bor pulit jong ka jylla ki dang leh ïa kaba donkam ban ïa pynbeit bad ka tnad district administration ban ai jingïarap ïa ki nongñiah kali kiba sahkut ha kane ka surok.
Na ka liang u Superintendent of Police ka East Jaiñtia Hills u la ong, “Ki pulit na Umkiang Patrol Post bad Lumshnong Police Station ki la sam jingbam bad umdih sha ki nongñiah trok bad kiwei pat ki nongñiah kali katba ki ai khublei ruh ïa ka jinglah jong ki ban ïaishah ïa ka jingjia bor mariang kaba la jia khlem poi pyrkhat”.
