MAIRANG:
Ka surok shnong Nongkasen- Mawkaton-Laitkseh kaba baroh shi kata ka la ai jingmyntoi ïa kiba bun ki paidbah nongshong shnong kiba shong basah ha kitei ki shnong hynrei mynta ka la jot rathai bad la bun sa tang ki thliew suda bad kane kala wanrah jingeh shibun ïa ki kali kamai bad ïa ki kali kit mar biskot khamtam ha kaba dei u aïom biskot kaba ki paitbah ki ïa kamai ja kpoh na une u mar rep.
Ka jingsniew jong kane ka surok ka la buh jingeh ïa ki khynnah skul bad khamtam ïa kiba pang ba shitom bad ki don ruh ki kali heh kiba la sahkut teng ha kane ka surok tang namar ka jingtlor noh bad julor noh jong kane ka surok bad ha ka por lyiur namar ka jingjur u slap ki shong um noh ha kitei ki thliew kiba la pei kaba pynlong ïa ki kali ban sahkut na ka por sha ka por.
Na ka liang jong u Kynjatshai ula ïoh ban leit ha katei ka shnong kaba hap hapoh u pud u sam jong ka Eastern West khasi Hills District ban wad jingtip kham bniah halor ka jinglong jong katei ka surok, la ka lah don ne em ka jingkren na ka sorkar ban maramot noh ïa katei ka surok.
Katkum ka jingïoh jingtip la ong ba kane ka surok ka dei kaba jrong kumba 2 Km eiei kaba ïasoh lang bad ka surok Mawkaton & Laitkseh bad ïa katei ka surok la sdang maramot naduh u snem 2012 bad ka la neh tang haduh u snem 2017 bad mynta la 5 snem la shu ïeh bein khlem ka jingmaramot.
Ha ka jingkren bad uwei na ki nongpynïaid shnong kata u bah T.Myrthong u Secretary ka shnong Nongkasen ula ong ba ka shnong lem bad ki nongpynïaid ki lah dep ban leit kynduh ïa u Sub-Divisional Officer jong ka PWD Road Nongkasen ban kyntu ban maramot noh ïa kane ka surok namar ba ka la jot palat kam i long shuh ban ïaid kali. Na ka liang jong u SDO ula ong ba ka hukum ban pyntrei, ban maramot ka dang don lynti bad ka shnong kan hap ap haduh ban da mih ka hukum na ka sorkar ban pynthymai ïa katei ka surok.
Ha kaba ïadei bad ki jaka kiba la thliew, ki nongpynïaid shnong lem bad u sordar ki la dep ban kyntu ïa u SDO ba un shu pyndap khyndew noh ïa ki thliew kiba la heh katba ym pat ïoh ïa ka work order ban pyntrei khnang ba kan ym don ka jingsahkut jong ki kali kiba ïaid lyngba katei ka Surok.
Katba na ka liang jong ki paidbah kiba ïaid na katei ka surok ki dang ïai ap ban ïoh maramot noh khnang ba kan pynsuk ïa ki ban ym jynjar shuh ha ka leit ka wan bad ka ban pynsuk ruh ïa ki draibar kiba ñiah ïa ki kali kiba kamai man ka sngi lyngba katei ka surok.
