SHILLONG:
U MLA ka Nongpoh konstitwensi, u Bah Mayralborn Syiem, ha ka 21 tarik Ïaïong, u la ong ba ki jaka pule doktor (medical colleges) ki dei ban wanrah noh ha ka jylla Meghalaya, khamtam ha Ri Bhoi distrik bad ki briew ki dei ban jied ïa ki laiñ pyntbit ha ka liang ka koit ka khiah khnang ba ka jylla kan don la ki jong ki briew ki ban peit bad pynïaid ynda la wanrah ïa ka skul pule doktor (medical college).
U Bah Mayralborn Syiem u la kam ba naduh u snem 2012–2013, ka la don ka jingpyrshang ban wanrah ïa ki jaka pule doktor hapoh ka jylla. Katba ka Tura Medical College ka la sdang ban wandur, ka Shillong Medical College kam pat shym la ïohi ksai ei ei. Watla katta, ka don ka jingkyrmen ba ka ki skul pule jong ka sorkar pdeng lane sorkar jylla kan sa don noh shen.
Shuh shuh, u Bah Syiem u la pynshlur ïa ki khynnah pule bad kiba la pyntbit ban bteng ïa ki jingpule ha tnad ka koit ka khiah, bad u la bynrap ba, “Hadien ba la sdang ïa ka jaka pule doktor (medical college), la ka long ha Shillong ne ha Tura, nga sngew ba ngi dei ban don briew kiba shemphang na ka jylla, ki lecturer, ki nonghikai, kumta ki briew na ka jylla ki la dei ban sdang wad bniah lane ban bteng biang ïa ka jingpule, khnang ba ynda ngi la ïoh ïa ka skul pule doktor, ngin don ki briew lajong kiban trei ha ka.”
Haba kdew ïa ka nuksa jong ka AIIM kaba dang shu plies hen ha Guwahati, u Bah Syiem u la ong ba bun kiba la pyntbit ha ka liang ka koit ka khiah, ki nonghikai na kiwei ki bynta jong ka thaiñ shatei lam mihngi ki la shah khot ha ka sorkar jong ka jylla Assam ban shakri ïa ka jylla.
U Bah Syiem u pynpaw ka jingkyrmen ba ka sorkar MDA 2.0 kan trei ban pynthikna ba yn shna ïa ka skul pule doktor ha Ri Bhoi, kaba la ithuh kum ka “Aspirational District” da ka NITI Aayog.
