NONGPOH:
U MLA ka Nongpoh, u Bah Mayralborn Syiem, ha ka 4 tarik Naitung u la pynpaw ïa ka jingsngewkhia halor ka jingpynkhreh ka Sorkar Pdeng ban wanrah ïa ka Uniform Civil Code (UCC) hapoh Parliament. U Bah Mayralborn u la pynpaw ïa ka jingsngew jong u halor ka UCC da kaba ong, ba ka jingpyntreikam ïa ka kan long beit ban wanrah tang kawei ka aiñ ha ka ri India baroh kawei. U la ong ruh ba kane ka lah ban long ka jingma kaba khraw ïa ki riti dustur bad ki kolshor jong ka jylla.
“Lada ka UCC ka treikam ha kane ka ri jong ngi ka long kaba ma haduh katta katta, namar ngi don la ki jong ki riti dustur”, la pynpaw u Bah Mayralborn da kaba kdew kyrpang ha kane ka thaiñ shatei lammihngi ha kaba la shong da ki jaitbynriew riewlum bapher bapher.
Hynrei, u Bah Mayralborn u la ong pat ba um pat lah ban tip shai halor kane ka Bill namar ba ka Sorkar Pdeng ba la ïalam da ka BJP kam pat sam ïa ka Bill bad ki paidbah lane bad ka parliament ruh. U la ong ba khlem ka Bill kaba yn sa wanrah hapoh Parliament, kim lah ban rai la kin kyrshan lane pyrshah ïa ka jingpyntreikam ïa ka UCC.
“Katba kim pat wanrah ïa kane ka Bill ha Parliament ngim pat lah ban tip, la ngi ki jaitbynriew riewlum ngin shah pynlait ne kan treikam salonsar ïa baroh? Ngim pat lah ban ong namar ngim pat ïohi ïa kane ka aiñ rew”, la ong u Bah Mayralborn.
U Bah Mayralborn u la ong ruh ba ha u hi shimet katkum ka jingsngewthuh jong u, um lah ban pdiang ïa kane ka aiñ bad ka dei kaba hap ban ïasaid katba lah ban pynlait ïa ka thaiñ shatei lammihngi. “Ngi ngi don ka jinglong kaba kyrpang. La ithuh kyrpang ïa ngi wat ha ka constitution jong ka ri India ha ka Khyrnit ba Hynriew”, la bynrap shuh shuh u Bah Mayralborn.
U Bah Mayralborn u la kyntu ruh ïa ki MP ka Lok Sabha na ka jylla, ïa u Bah Vincent Pala bad ïa ka Agatha Sangma bad ïa u MP ka Rajya Sabha u Bah WR Kharlukhi bad ïa baroh ki MP ka thaiñ shatei lammihngi ba kin ïakren halor kane ka mat ba kimdei ban ktah ïa ka aiñ ka dustur jong ka jylla bad ka thaiñ shatei lammihngi. “Kine ki dei ki Hidden Agenda kiba ima bha kiba na ka liang ka Sorkar Pdeng ka pyrshang ban tuklar bad mushlia. Ngi hap ban pynkhreh ïalade ban ïada”, la ong u Bah Mayralborn.
U Bah Mayralborn u la kdew ruh ba kane ka jingleh ka lah ban dei na ka bynta ka jingthmu ba bha jong ka Sorkar Pdeng, hynrei u la kren shai ba ha ka synshar paidbah ki don beit ka jingïohnong bad jingduhnong. “Ki don ki jait bill kiba pynlong aiñ kiba ïarap ïa u paidbah bad ki don ruh kiba ktah ïa u paidbah”, la bynrap u Bah Mayralborn da kaba ong ruh ba ki riew stad aiñ bad ki khraw pyrkhat ki dei ban ïaleh ban pynneh pynsah ïa ka jinglong tynrai jong ka jaitbynriew.
