MAWKYRWAT:
U Bah Renikton L. Tongkhar MLA ka Mawkyrwat Constituency myn ha ka sngi ka 13 tarik u Nohprah ha ryngkat da ka jingïadonlang u Bah I. Lawrynniang BDO ka C&RD Block Mawkyrwat ki la ïoh ban plie paidbah noh ïa kawei ka jaka jngoh kai pyrthei kaba itynnad kaba la tip kum ka Urnar Viewpoint kaba don ha shnong Mawrap South West Khasi Hills District ha kaba ïa kane ka Urnar Viewpoint la shna lyngba ka skhim Mahatma Gandhi National Rural Employment Guarantee Act ( MGNREGA) jong u snem 2022-23 ha ka mang tyngka kaba T.9 lak tam ba la pyntrei da ka VEC Mawrap bad kumjuh ruh na ka skhim CMSDF ha ka mang tyngka kaba 2 lak sanphew hajar tyngka bad ïa kane ka Urnar Viewpoint la pynïaid da ka Sharailang Tourism Cooperative Society LTD Mawrap South West Khasi Hills District.
U Bah Renikton L. Tongkhar haba kren ha kane ka sngi u la pynpaw ka jingsngewnguh ïa ki paidbah jong kane ka shnong ba ki don ka mynsiem ban ïa trei lang ban kyntiew ha ki kam jngohkai pyrthei da kaba u la ïa wer ïa ki nongjngohkai pyrthei na kylleng napoh ka Ri khasi jong ngi bad kumjuh ïa kiba nabar ka jylla ban wan sakhi hi da la ki jong ki khmat ban wan peit ïa shibun ki jaka jngohkai pyrthei kiba itynnad tam kiba don hapoh ka South West Khasi Hills District. Ha kane ka sngi la ïa don ryngkat naduh ki rangbah shnong ki paidbah jong ka thaiñ bad la pynshit pynshngaiñ shuh shuh lyngba da ka jing rwai na u Bah Amnis Shangdiar.
