SHILLONG:
U Nongïalam ka Voice of People Party (VPP), u Bah Ardent Miller Basaiawmoit, u la kynthah tyngeh ïa kiba pynmih ïa ka khubor halor ka jingdon jingem jong u da kaba ong, “Phi lah ban wad bad sei madan ïa ka jingdon jingem u Bah Ardent hynrei da sei madan lang ruh ïa ka jingdon jingem jong ki nongïalam jong ki ruh.”
U Bah Ardent u la kren ïa kane ha ka jingïalang paidbah jong ka VPP ha Umsning, ha kaba u la kynthah ïa ki briew kiba la pynmih khubor halor ka jingthied kali fortuner jong u.
“Nga da samrkhie ïa kawei ka dur kaba ki la sam paidbah hadien ka jingïalang ha Sohiong, ka heading kaba shyrkhei hana ba mih ka kali fortuner ba niah u Bah Ardent, nangno u ïoh pisa? Ki kylli, hynrei ngam sngewpher da mih ki jingkynnoh bad nga sngewtynnad ba ki paidbah ruh kin sei kin tohkit ïa ka jingim jong ngi,” u la ong.
“Ïa u Bah Ardent ki la sei madan lut halor ki khun u Bah Ardent, halor ka jingdon pisa, halor ka jingdon kali, ka biang namar ngi dei ki nongtrei paidbah bad ki paidbah ki dei ban sngewlyngngoh, hynrei ka jingshisha ka long ba nga khlem thied ïa ka kali kaba T40-T50 lak hynrei ka dei ka kali kaba thied da ka ram bad nga la long MLA ngam nang ban thied ram ïa ka kali te ngan shong da ka bolbaring?” ong u Bah Ardent.
U la bynrap shuh shuh, “Nga khot sngewbha ïa kito kiba kwah ban tip ïa ka jingdon jingem jong nga, ki lah ban wad da ka RTI, lada ki kwah tip haduh katta katta bad ki dei ban ïaid da ka lynti ka aiñ, ai ka pyrthei kan tip nga thied ïa katno ka kali rim da kaba nga tuh ne da ka um syep lade.”
“Hynrei tang kawei kaba shai ngan ong ba lada phi kwah ban sei ïa ka jingdon jingem jong u Bah Ardent, ka bha hynrei phi dei ban sei lem ïa ka jingdon jingem jong ki nongïalam jong phi ruh, katno tylli ki ïing ki don, bad wad kham bniah ruh ïa nga khnang ba ki paidbah kin shai,” u la ong.
U Bah Ardent u la ong ruh ba ka VPP kam bishni ïa u briew u ba kiew spah da ka umsyep lade, ka VPP ka ai ka jingïaroh ïa kum kine ki briew hynrei ka VPP kan ym ailad ïa kiba kamai spah da kaba lute ïa ki paidbah.
“Ka VPP kan ïeng ban ïakhun ïa ki kam bamsap ki kam bamduh ki bor jong ka sorkar, ngin hap ban ïaleh pyrshah hynrei ki don mynta kiba la ïeng ban ïaleh pyrshah ïa ka VPP, ki sngew donkam ban pynsngewthuh bakla ïa u paidbah ban pynartatien ïa ki paidbah,” u la ong.
U la bynrap, “ki la sngewthuh lada ka VPP kan poi sha ka thong ba ka buh ban pynim pat, ban pynbha pat, bad ban pynkylla dur ïa ka jylla, kito kiba la ïoh jingmyntoi na ka jingkjit ïa ka spah jong ka ri kin duh jingmyntoi.”
