SHILLONG:
Ka Myntri ka rep ka riang ka Kong Ampareen Lyngdoh, ha ka 19 tarik Jylliew ka la ong ba ka dei ka kamram jong ka sorkar ban pyntip sha u paidbah lada don kano kano ka jingma ha jingbam jong kano kano ka jait bam.
Kane ka long hadien ba ka sorkar ka la mana ban bam ïa ki katto katne ki jait jingbam, kaba kynthup ïa ka dohkha, ka doh masi bad ka doh sniang.
Ha kaba ïadei bad ka dohkha, ka Kong Ampareen ka la ong ba haba ka sorkar ka la pyntip ba la lap ba ka don ïa kita ki bynta jong ka dawai kiba ktah ïa ka koit ka khiah, kam mut ba ka sorkar ka kwah ban khang ïa ka bylla jong no jong no, hynrei ka dei ban pyntip sha u paidbah ba tad haduh ban da la lap ba ka dohkha ka la long kaba bit kaba biang ban bam, te ka sorkar kan sa pyntip ïa kata.
Ka la ong ruh ba kane ka jingpyntip sha u paidbah kam dei ka jingmana ne ka jingkhang ïa ka bylla jong no jong no hynrei ka dei namar ba ka sorkar ka don hok ban pyntip sha u paidbah.
Halor ka jingbam ïa ka doh masi bad ka doh sniang, ka Kong Ampareen ka la ong ba ki don kita ki khñiang jingpang ba la shem da ki tnad sorkar ba don kum kita ki jait khñiang jingpang ha kita ki doh kiba ju mlien ban bam ki nongshong shnong ka jylla. Kumta ka sorkar ka kyntu ba ki paidbah kin shim khia ïa kane khnang ban lait na kano kano ka jingjia kaba sngewsih ha ka imlang sahlang.
