SHILLONG:
Ka Myntri ka Tnat ka koit ka khiah ka Kong Ampareen Lyngdoh haba kren halor ka jingjia kaba dang shen halor ka jingkhlad jong u khyllung, ka la ong ka jingkhlad jong u khyllung uba ka longkmie ka kha ha Ganesh Das Hospital, namar ka jingsahkut u thyrnia ha ka met kam don kano kano ka jingjia kaba dei na ka jingleh torti.
“Kam don kano kano ka jingleh bym dei, kam don ka jingbakla haba ïadei bad ki doctor ne ki nurse,” la ong ka Kong Ampareen, kaba la ïathuh ha kiba ha ïing kiba wan ban ïakynduh ïaka.
Ka la ong ka mat ban siew ‘bai lut ksan’ kan dei tang lada ka don ka jingleh bymsuid ñiew na ka kynhun sumar.
Ka Myntri ka tnat ka koit ka khiah ka la ong ba kaei kaba ki lah ban ïarap ïa ka kmie bad ïa u khyllung ki la leh hynrei sngewsih ba ki duh noh ïa u khyllung.
Katkum ka jingïathuh jong ka, ine i khyllung idei i khun ba saw jong kane ka longkmie. Ka Myntri ka la ong ba kane ka longkmie ka ïoh ïa u khun u ba nyngkong da kaba puid, bad u khun uba ar, bad u balai ki khlad noh kumba long ine i khun ba saw.
Ka Kong Ampareen ka la ong ruh ba kan sa peit bniah haba ïadei bad kane ka mat, haduh mynta tang kane kaba ka don jingtip bad ka leit katkum kaei kaba ka ïoh jingtip.
Ka Myntri ka la ïathuh ba ka jingtohkit halor kane ka jingjia ka la ïaid lyngba ka tnat.
Ka la bynrap da kaba ong ba lada kamdon ka jinghun halor kane ka mat, ka sorkar kan sa phah tohkit bha halor kane. Ka la bynrap shuh shuh da kaba ong ba ka kmie ka don ha ki kti jong ki nongsumar kiba biang bad kan sa leit ban ïakynduh ïa ka ha ïing jong ka ban peit ba baroh kin ïaid beit ïaid ryntih.
Ka la ong ruh ba kan ym kular eiei, da kaba ong ba ka MHIS ka don bad ka kmie kan ïohpdiang baroh kiba dang sah kumba ka dei hok.
Ka la pynpaw ruh ïa ka jngsngewsih halor kane ka jingduh kaba khraw da ka jingkhlad jong ine i khyllung.
Ka Kong Ampareen ka la bynrap da kaba ong ba kane ka jingjia kam dei ban kynnoh ba ka dei ka jingleh torti jong ka Ganesh Das Hospital, namar kaei kaba ki dei ban leh ban ïada ïa ka kmie bad ïa i khyllung ki la leh hapoh kane ka jaka Sumar.
“Kan don ka jingbym biang, ka bym paw kum ka jingleh torti,” ong ka Myntri.
Ka la ong ba ka Ganesh Das Hospital kan don ïa ki kor ki bor kiba biang, lada jia kino kino ki jingjia ki bym poi pyrkhat,bad ka long kaba dei na ka liang ka Hospital ban phah sha wei pat kiba don ki tiar kiba biang.
Ka dei hadien ba ki la phah sha North Eastern Indira Gandhi Regional Institute of Health and Medical Sciences, ba ki la lah ban weng ïa u thyrnia uba don hapoh ka met jong ka.
Ka Kong Ampareen ka la ïathuh ba ka tnat ka la thung ïa ka kynhun tohkit halor kane. Ka la ïathuh ruh ba ka jingtohkit kan dei ha ka kyrdan jong ka Director of Health Service (Medical Institutions).
