NONGSTOIÑ:
Ka seng Khasi Student Union (KSU), West Khasi Hills District unit, kala kam ba kala lap ba ka don ka jingthung kam sop sop ha ki ar tylli ki tnad sorkar hapoh West Khasi Hills District.
Katkum ka jingïathuh u Bah John Fisher Nongsiang, President ka Seng, la ong ba kila don haduh 17 tylli ki kam bala thung sop sop hapoh ka ka tnad ka koit ka khiah bad 4 tylli hapoh ka tnad PHE Nongstoiñ.
Shuh shuh u la ong ruh ba hadien ba ka Seng ka la ïoh pdiang ïa ki jingujor kala wad jingtip ha kaba ka Seng kala lap ba kila don shisha ka jingthung kam khlem da pynlong ïa ka interview bad kane kala ktah ïa ki samla wad kam na ka dong ka thaiñ.
Halor kane na ka liang jong ka Seng ha ka 7 tarik Rymphang kala leit ban ïakynduh ïa u Deputy Commissioner, ka West Khasi Hills u Bah Garod LSN Dykes ban pan jingshai halor kitei ki jingthung kam sop sop ha kaba na ka liang jong u DC u la ïathuh ha ki dkhot ka KSU ba um ïoh jingtip eiei ruh em halor katei ka jingjia.
Kumta na ka liang jong ka Seng KSU kala kyntu ïa u DC ba u dei ban shimkhia halor katei ka bynta bad ban pynshitom ïa ki ophisar kiba don kti ban thung kam sop sop khlem da leh ha ka lynti kaba dei bad kaba shai.
