SHILLONG:
Ka jingmih ki khubor ba ka don ka jingpang kaba ktah ïa ka sniehdoh jong ki masi ba la tip kum ka Lumpy Skin Disease (LSD) ka la pynsheptieng bad pynkhohñioh ïa kiba bun ki briew ha kaba ki la kiar na kaba thied ïa ka doh bad ïa ka dud masi. Hynrei na ka liang u Joint Director ka tnad Aminal Husbandry and Veterinary, u HK Marak, u la ai ka jingpynthikna ba kam lei lei ban bam ïa ka doh bad ban dih ïa ka dud masi, hynrei hap ban das het bha, tangba u maham pat ban bam ïa ka dohthad namar ba la shu pynih tang da ka tdem ding.
“Ka LSD kam dei kaba ïabit ha u briew, kumta ka dud bad ka doh ka long kaba shngaiñ ban bam, tangba hap ban da shet bha”, la ong u HK Marak.
Na ka liang une u Joint Director ka AH&V u la ïathuh ruh, “Ha ka jylla ngi la wad bniah bha ïa ka jingsaphriang une u khñiang jingpang, bad ïa mynta ngi la ïoh jingtip ba ki don haduh 3500 tam ki masi ba shah ktah ha u LSD bad 29 tylli kiba ïap na une u khñiang jingpang”.
Shuh shuh na ka liang u Marak u la ïathuh ruh ba haduh mynta hi ym pat lah ban sumar lane ban pynkoit ïa une u khñiang jingpang, hynrei kaei ba ka tnad ka lah ban leh ka long tang da kaba ai tika ïada ïa ki masi ki bym pat shah ktah ha u khñiang jingpang.
“Kane ka LSD ka lah ban ktah ïa baroh ki masi. Une u khñiang jingpang u saphriang na ka jingshah dait ha u skaiñ lane ki kaiñ pyrjong kiba la dait teng ïa ka masi kaba don jingpang”, la ong u Marak bad ïathuh ruh ba ki nongri masi ki lah ban ithuh ïa ki dak ki shin jong ki masi kiba shah ktah ha kane ka jingpang bad haba ki ïohi ïa kine ki dak ki shin ki dei ban shim khia da kaba pynïakhlad ïa kine kiba shah ktah na kiwei pat ki masi kiba shait ba khlaiñ.
“Ki dak ki shin kiba nyngkong eh ba lah ban ithuh lada don kane ka jingpang ka long kum ka jingkhie shit kaba jur, ka jingtuid ummat bad eitmut, bad kaba lah bha ban ithuh ka dei ka jingmih ki khñiang kiba at ha ka met ki masi, ka jingtlot bad ha ki masi kynthei ka lah ruh ban don ka jinghap khun”, la ong u Marak.
U la ïathuh ruh ba dei ban khanglad ïa kine ki masi kiba shah ktah ha une u jingpang ba kin ïabam phlang lang bad ki masi kiba shait ba khlaiñ ban da lehkhuid bad ban pyndonkam ruh da u shynrai ha ki masi ban ïada na ka jingshah ktah ha une u jingpang bad kaba kongsan ka long ba dei ban da tep bha shaphoh khyndew ha ka jingjylliew kaba hynriew phut.
“Dei ban da peit bha ba kan nymdon ka jingrah ïa ki khñiang jingpang na ki masi kiba shah ktah sha kiwei pat ki bym shah ktah, wat ha iew ruh ki dei ban peit bha ban kiar na kane”, la ong shuh shuh une u Joint Director.
