SHILLONG:
Ha kine ki khyndiat sngi ka Khasi Hills Autonomous District Council (KHADC) kala pynmih ïa ka hukum ba ki nongïalam shnong kim dei ban ïadon bynta ha ki kam saiñ pyrthei.
Ha kaba ka la mih ka jingpyrshah na ka synjuk ki nongsynshar shnong na Ri Bhoi haba ïadei bad kane. Na ka liang u Chief Executive Member ka KHADC u Bah Titosstarwell Chyne haba kren bad ki nongthoh khubor halor kane ka mat u la ong ba kan bha eh ba ki rangbah shnong na Ri bhoi kin wan ban ïa kynduh bad ïasyllok.
“Ha ka jingsngew ka jong ngi, ka long ba lada ki khlieh nongsynshar ki ïa don bynta lang ha ka politic bad ki don liang noh, ngi tieng ïoh ka mih ka jingleh shiliang, ym dei ba leh shiliang u rangbah shnong ïa ki paidbah hynrei ïoh ka mih ka jingshah leh shiliang jong u ha ki nongmihkhmat,” u la ong.
U la bynrap ruh da kaba ong ba kato ka shnong kan duh nong tang na ka daw ba u rangbah shnong u dei u briew jong ka wei ka party.
“Ngin ïasyllok, ka jingkhang kam pat khnang ban don kano kano ka jingïatai ne ka jingïasylok ha kane ka bynta, nga kwah ba kin wan ban ïakynduh ban ïa phylliew jingmut,” u la ong.
U la bynrap ruh da kaba ong ba kane ka dei ka shibynta ba ka council the lakam ban lait na kino kino ki jingïapaid ïapra hapoh shnong poh thaw bad ki thrang ba ka shnong kan don hapdeng ka jingïatylli.