NONGPOH:
Ha ka miet jong ka 9 tarik Lber ha ka por 12 baje ei ei shiteng synïa, kawei ka trok kit marbam bad ki tiar donkam, kaba don ïa u nombar AS-11-DC-3353, ka la kem ding kynsan haba ka la poi ha ki bynta ka shnong Shangbangla ha Ri Bhoi, kata hadien ba ka la mih na Guwahati ban leit sha Shillong.
Ïa kane ka trok la niah da u Somsul Sul Islam Tapadar na Assam bad kaba dei ruh ka trok kaba kit Atta, ki Amul, ki Umphniang Urea lem bad kiwei kiwei. Kane ka trok ka la kem ding kynsan haba ka la poi ha katei ka jaka bad ïa ka daw jong katei ka jingkem ding la ong ba ka dei na ka jingthut ki wire hapoh ka trok, bad la ong ruh ba nyngkong ka la sdang ban kem ding ha ki bynta jong ka Engine bad hadien kata pat ka ding ka la pur sha baroh ki bynta jong ka trok.
Ha kane ka jingjia, baroh ki tiar kiba la thep hapoh ka trok, ki la ingkhong lut bad ym don shuh wat tang kawei ruh ka tiar kaba dang long ban pyndonkam, namar ba ki la shah bamduh ha ka ding kaba la klang shyrkhei bha. Hadien ba la ïoh jingtip, ki Pulit pynlip ding ka Nongpoh ki la leit mar mar sha katei ka jaka ban tem ïa ka ding, hynrei kim lah ban pynlait ïa ki tiar hapoh katei ka kali na ka jingingkhong.
Shuh shuh, ym shym la don kano kano ka jingjia ba sngewsih ne mynsaw briew, ha kaba wat u nongniah bad nongbud jong ka trok ki la lait phet khlem da mynsaw. Hynrei ka jingjulor ha katei ka jingpluh ka trok ka la kot sha ki Lak tyngka, namar katei ka trok ka kit ïa ki tiar kiba kham remdor.
