SHILLONG:
U Bah Robin Chyne udei uwei na ki nongseng kam lajong uba la pyndonkam da ki snieh ban shna ïa ki Bek, ki plakot, ki Jacket snieh bad kiwei kiwei.
Haba kren bad u Kynjatshai u Bah Robin u la ong ba u la sdang ïa kane ka suh bek naduh u snem 2019 bad u nang hi khlem ka jingleit pule lane pyntbit ha kino kino ki jaka pule. U la sdang ïa kane ka kam marwei hynrei suki suki u la lah ban buh ïa ki nongtrei ban ïarap ïa kane ka kam.
“Nga sdang ïa kane ka kam naduh ba dang khynnah da kaba suh ïa ki jaiñ bad ïa ka kam suh snieh pat nga sdang ha u snem 2019 namar ba ngan kwah ban thied ïalade ki jaket snieh ruh ka long kaba rem, te balei ngam shu sdang noh ban shna lane ban suh noh ïalade. Nangne ka sdang ban pule ban wad bniah haduh 3 bnai nga pynleit jingmut ha kane ka kam haduh da nang”, la ong u Bah Robin.
U la ong ba bun ki tiar u thied ki dei napoh China namar ha India kim da kham don bad kane ka kham jynjar khyndiat ïa u. La suh ïa kine ki plakot, ki Wallet, ki bek bad kiwei kiwei da ki snieh kiba paka. U la ïathuh ba dang ha kine ki bnai ba la dep ki dang shu dep plie ïa ka jingshna na ka bynta ki jaket snieh bad kata ruh ki shna lane pynsuh tang lada don ki kwah.
U Bah Robin u la ong ba lai snem lynter u la trei beit na la ïing bad suki suki ki briew ki paralok ki parajor, kiba haïing hasem ki la sdang ban ïaroh ïa ka kam ba u trei bad ma u ruh u ïoh mynsiem nangne. Mynta u la ïoh ban ai jinghikai kaba lai bnai sha kito ki samla kiba kwah ban nang ha kane ka kam. U la ïathuh ba ka dukan kaba nyngkong ka don ha Donbosco Square.
Kawei ka jingeh kaba u ïakynduh haba shna ïa ki bek, ki jaket ka dei namar ba hap ban trei da ka kti namar ba don ki jait snieh ba kham jynjar ban suh da ka kti bad ka donkam da ki kor.
“Ka mar ba ngi thied ruh kam dei ka mar kaba tad tor hynrei ka dei ka mar kaba rem bad ban pynlut ha kaban thied ïa ki kor khamtam ban pynheh ïa ka jingtrei. Ka jingeh kumba long mynta ka dei ba donkam ïa ki kor ban pnwandur ha ka jaka ban pyndonkam da u tyrnem. Hynrei kumba long mynta hap pyndonkam da u tyrnem bad kiwei ki kynja tiar ban jingthoh”, la ong u Bah Robin.
U la ong ba kawei ka jingeh ruh ba u mad ka dei ba kine ki snieh shisien ba la shna ym long ban bakla bad shisien ba la bakla kan long ka jingduhnong kaba khraw.
Ha kaba ïadei bad ka jingpynïaid iew ïa kine ki mar ba suh da ki snieh paka, ka long ba ki briew mynta kim wad shuh ïa ka jinglong jong ki mar hynrei ki wad beit da kaba kham tad. Ka jingïapher hapdeng ki snieh ki bym dei snieh paka ki long ka dor jong ki ka kham tad kum ka nuksa ki ïoh ha ka dor kaba T.500 bad ki briew ki lah bha ban thied hynrei haba ïanujor bad kine ki snieh ba paka ka dor pat ka la kham heh shaba palat.
U Bah Robin u la ong ba uno uno u briew uba wad da kine ki snieh kiba kham bha watla ha ka dor kaba kham rem hynrei ka neh pat shirta.
U la kyntu ïa ki samla ba kim dei ban shaniah tang ha ki kam sorkar hynrei ki dei ban ieng ha la ki jong ki kjat bad lyngba kane kan long ka jingplie lad plie lynti na ka bynta kiwei ruh.
