Ri Bhoi:
Ki saw tylli ki sengbhalang kiba don ha ka Ri Bhoi District kiba kynthup ïa ka Khasi Students Union (KSU), Federation of Khasi, Jaiñtia and Garo People (FKJGP), Ri Bhoi Youth Federation (RBYF) bad ka Hynñiewtrep National Youth Front (HNYF) ha ka 25 tarik Naiwieng, ki la pynlong ïa ka “Non Cooperation Movement”, da kaba khang khyrdep lut ïa baroh ki ophis treikam jong ka sorkar.
Kane ka la pynthut ïa ka jingkhot interview kam ba la long hapoh ka ophis jong ka Superintendent Engineer jong ka Public Health Engineering (PHE) ha Nongpoh.
Kane ka ka jingïakhih jong kine ki sengbhalang ka long ban pyrshah ïa ka jingshah siat ïap ki khasi ha ki pulit Assam, kaba la jia ha ka 22 tarik Naiwieng, ha ka shnong Mukroh, West Jaiñtia Hills distrik.
Shuh shuh la ïohi ïa ka jingpynrung ïa ki babun ngut ki pulit hapoh ka phyllaw jong ka ophis u Deputy Commissioner Ri Bhoi District ban tehlakam ïa ka jingïoh rung ki dkhot ki sengbhalang hapoh ka ophis.
Ha kane ka jingjia, ka la don ka jingïakhluit hapdeng ki nongïalam sengbhalang bad ki magistrate kumjuh bad ki pulit. Kumta ki sengbhalang ki la mih noh na kane ka jaka ryngkat ka jingbyrngem ba lada jia kaei kaei; ‘ka bor District ka dei ban shim ïa ka jingkitkhlieh’.
