SHILLONG:
U President ka Hynniewtrep National Youth Front (HNYF) u Bah Bless Dkhar u la ong ba na ka liang ka seng ka pynpaw ïa ka jingbym sngewtynnad halor ka jingkren jong u MLA ka North Shillong u Bah Adelbert Nongrem pyrshah ïa ki sengbhalang.
Kane ka jingkren ka long ba hadien ba u Bah Adelbert Nongrum u la ong ba ki sengbhalang hadien ba ki la ïoh ka shuki ki la klet noh pat ïa ka jingieid jaitbynriew. Ïa kane u la kren ha ka rynsan jingïalang jong ka Voice of the People Party (VPP) ha ka 17 tarik mynta u bnai,ban dawa ban pynbeit thymmai ka ka Reservation Policy hapoh ka jylla, kaba la pyllong ha Additional Parking Lot, Secretariat.
Haba kren sha ki lad pathai khubor u Bah Bless u la ong, “Ngim don daw ei ei hynrei ka jingkynnoh bad kynthoh ïa ki sengbhalang kam long kaba sngewtynnad. Lada don kino kino ki mat lane kano kano ka jingsngewkhia, ha kaba ïadei bad ka jaitbynriew, ma ki ruh ki hap ban ieng ha la ka jong ka nongrim, namar mangi ruh ngi khlem kynthoh ei ei ïa ki”.
U Bah Bless u la buh ka jingkylli ruh ïa u Bah Adelbert ba mano kita ki sengbhalang ynda ki la poi ha Secretariat, kita ki mat ba ktah ïa ka jaitbynriew ki jah noh. U la ong, “Ka jylla jong ngi mynta ka la poi 51 snem naduh ba la ïoh ïa ka jylla lajong hynrei ngi ïohi ba ki party riewlum pat na kawei ka sngi sha kawei ka sngi, na kawei ka por sha kawei ka por hynrei ngam kwah ban kren pyrshah hynrei kawei nga kwah ban ong ba ma ki ruh ki khlem poi shaei shaei. Mangi ki senbhalang phi kynnoh ynda ngi la poi ha Secretariat ngi klet noh ïa kiei kiei baroh, te mano hi kita kiba poi secretariat. Ka secretariat kadei tang kata ka jaka kaba ngi kum ki sengbhalang na ka por sha ka por ngi dawa ïa ki mat kiba ktah ïa ka jaitbynriew”.
U Bah Bless u la ong ba bun ki political party naduh ba la ïoh ïa ka jylla lajong mynta la 51 tylli ki snem katno tylli kiba dang sah bad katno tylli kiba la jah. Ka jingmih jong ki party na ka por sha ka por ka pynpharia ïa ka jaitbynriew namar ka jingmih bun ki party ka pynïohlad ïa ki party ba naber ka jylla ba kin wan ban suhthied hapoh ka jylla bad ruh ban thaw sorkar.
“Ki paidbah kimdei ban leh shongshit, ki paidbah kimdei ban ngeit kulmar namar ba don kiba shim kabu ba la jan sa ka elekshon bad nga hap kren ïa kane namar ba la kynthoh ïangi, ngi hap kren ïa ka jingshisha. Haei ka jaitbynriew ka poi mynta, katno tylli ki party riewlum, katno tylli ki party riewlum ki la khylliap lama bad nga ngeit skhem ba dang don shuh ki party kiban dang khylliap lama nangne shakhmat, balei namar ba ka jaitbynriew jong ngi kam don ka jingïatylli”.
U Bah Bless u la ong ba kumba 4-5 tylli ki party riewlum hynrei ym don pat kawei kaba lah ban ïatehsong ban ïatylli ban ïakren na ka bynta ki mat bad ki jingeh ka jaibynriew namar baroh ki kwah ban long nongïalam. “Ki paidbah kidei ban husiar bha namar kine ki long kum ki shrieh kiba la kynthih na kawei ka party sha kawei ka party”
U la ong ba kane ka jingkynthoh ïa ki sengbhalang kim sngewtynnad namar lada ki kwah ban kren, ai kin kren beit tang ïa ka party lajong lane ai kin kren beit tang ïa ka nongrim lajong. U la ong ruh ba lada ym don ki sengbhalang shaei ka jaitbynriew ka don. “Katno tylli ki party riewlum kiba neh haduh mynta, peit kum ka nuska ba ka seng KSU, FKJGP bad kiwei haduh mynta ki neh namar balei ki ieng ha ka nongrim ban ïada ïa ka jaibynriew”.
U Bah Bless u la ïai ba kane ka jingkynnoh bad jingkynthoh ïa ki sengbhalang kam long kaba sngewtynnad namar ki sengbhalang kim don bynta ei ei bad kino kino ki political party. “Katne tylli ki party riewlum, hato la ju don ne em kiba la shah kem na ka bynta ka dawbah ka jaitbynriew, katba ki sengbhalang katno ngut kiba la shah kem bad shah pynïap, katno ngut kiba la shah pyntieng pynsmiej na ka bynta ka dawbah ka jaitbynriew”.
Shuh shuh na ka liang ka HNYF ka la ong ba kam don kano kano ka jingpyrshah ïa kino kino ki political party ban pyllong ïa kino kino ki jingïalang lane kino kino ki mat ban dawa hynrei tang kawei ba wat kynthoh ïa ki sengbhalang.
