NONGPOH:
Ha kawei ka jingjia aksiden kali ba shyrkhei bad kaba la jia ha surokbah NH-6, kaba hap ha shnong Sumer Umbang ha Ri Bhoi, Hynriew ngut ki briew kiba shong hapoh kawei ka Bolero kaba don ïa u number AS-26B-7908 ki la khlad noh hashen, kata ka dei hadien ba ki la shah tynrah bad shah ban ha kawei ka Trok 12 shaka ba kit Dewbilat bad kaba don ïa u number WB-41G-7628.
Katei ka jingjia, ka la jia ha ka 26 tarik Rymphang ha ka por 2:30 baje ei ei janmiet, ha kaba katei ka Bolero, ka dei kaba la shong da hynriew ngut ki briew, kiba kynthup ïa ki Sister, ki Brother bad u Phadar.
La ong ba katei ka Bolero Mission ka dei na ka Diocese of Bongaigoan, Assam, ha kaba ka thmu ban kiew sha Shillong, hynrei haba ka la poi ha katei ka jaka, ka la shah tynrah noh ha katei ka Trok kit Dewbilat, kaba la wan sha ki thain Jowai ban leit sha Guwahati.
Katei ka jingjia aksiden, ka la long kaba shyrkhei eh, namar katei ka trok kaba la pynher sted, ha kaba ynda ka la poi ha katei ka jaka ba kham long khongdong, ka la jam sha shilliang surok bad tynrah beit ïa katei ka bolero, haduh ba kan da kylla khongpong ar ne lai sien, hadien kata pat, katei ka la ban ruh syndon ia katei ka Bolero, haduh ba katei ka Bolero ka ka la pra bad ym ithuh kali shuh.
Ka la shim por eh ban sei ïa ka met jong kitei kiba shong hapoh katei ka Bolero, ha kaba la hap ban pyndonkam da ki kynja Mashin ban ot ïa ki nar, namar katei ka Bolero ka la dam syndah na ka jingshah ban ha katei ka trok kit Dewbilat.
Ha katei ka jingjia, u nongñiah bad u nongbud jong katei ka trok ruh ki la mynsaw jur, ïa kaba la pynkit noh ïa ki sha ki jaka sumar ha Nongbah Shillong.
