SHILLONG:
Kawei ka longkmie ka ba la tip kyrteng kum ka Renubala Sangma 52 snem ka rta, ka la khlad noh hadien ba ka la kem pang kynsan na ka jingbam ïa ka dohkha ba la kylla bih ha ka jingïashim bynta ha ïing ïap briew ha shnong Mariampur, Assam ha khappud bad ka shnong Adokgre, North Garo Hills.
Lah ban kdew hangne ba kumba 200 ngut ki briew ki ba kynthup ïa ki 160 ngut na Garo Hills bad 40 ngut na Ri Bhoi district ki la kem pang kynsan hadien ba ki la bam ïa ka dohkha ka ba la sniew kumba la kynnoh da ki briew ba la ïohpang.
Kane ka jingjia ka la jia ha ka 10 tarik Jymmang ha ba ki briew ki la leit shimbynta ha kawei ka ïing ïapbriew ha ka shnong Mariampur, hynrei kyndit kynsan ki briew ki ba la wan ha kane ka ïing ki ba kynthup na Adokgre bad Kharkutta na North Garo Hills bad na Nongladaw ha Ri-Bhoi ki la kem pang lut bad poi sha hospital.
Katkum ka jingïathuh jong kine ki briew ki ba la kempang ka long ba ki la kem pang kynsan hadien ba ki la bam ïa ka dohkha kaba la pynkhreh ha kane ka ïing ba don kane ka jingjia, kaba katkum ka riti dustur ki ju bam shuwa ba kin leit phai sha la ïing.
Na ka liang uwei u nongshong shnong na kane ka shnong, u la ujor da ka ejahar ha Dhupdhara Police Station bad ki Pulit kila register case hapoh ka kyndon 328 IPC bad ka jingtohkit ka dang ïaid shakhmat.
Na ka liang ki pulit kila leit ban lum ïa ki sakhi bad ïa kane ka bam ban phah ïa ki sha Forensic Laboratory ban lap ïa ki daw halor ka jingkylla bih ka dohkha.
