SHILLONG:
Ka myntri ka tnad aiñ jong ka sorkar Jylla, ka ba long ruh ka chairperson jong ka Roster Committee ka kong Ampareen Lyngdoh, ka la pyntip ba ka sorkar jylla kan sa pynmih ia ka jingpynbna ka ba donkam halor ka jingthungkam thymmai ha ka jylla .
“Ka sorkar kan sa pynmih ïa ka jingpynbna ba donkam halor ka jingthungkam ha ka jylla namar ba baroh ki seng saiñpyrthei ha ka jylla ki dang don ka juh ka jingthmu ban peitbniah shwa ïa ka jingpyntreikam ïa ka Reservation Policy bad ka Roster system, bad kumta baroh ki jingthungkam dang hap ban pynsangeh shipor mynta”, ka la ong ka Myntri sha ki ladpathai khubor .
Ka la bynrap , “Ngam lah ban pynphai ïa ka phang, namar kane ka dei ka ri ka ba don ka shynshar paidbah ailad ïa ngi ba ngin ïaleh ban wanrah lang ïa baroh ha kajuh ka jingthmu bad lada don mano mano ba don ka jingeh, ki dei ban kdew ïa kata ka jingeh, bad hadien lai taïew , ngin sa lah ban sngewthuh kaei ka ban jia , hynrei kumba ka long mynta, ngi la ïa jingmut shwa ïa ka sorkar ba kan pynsangeh shwa ïa ka jingthungkam ha ka jylla”
Ka Chairperson ka Committee ka la pyntip ruh “Kum ka Committee kin hap ban bishar bniah bha shwa ha baroh ki liang shwa ban sdang biang ïa ka jingpynrungkam”, bad bynrap shuh shuh da kaba ong, “Na ka liang ka sorkar ka kwah ban sngap ïa ka sur u paidbah baroh halor kane ka mat”.
Ha ba kylli halor ka jingbuh por halor ka jingthungkam kan sdang biang ka Kong Lyngdoh ka la ong , “Ïa ka jingkylli ba haduh lano kane kan dang bam por kan long kaei kaei kaba na ka liang ka sorkar kan hap ban don bynta lang, ngan ym lah ban ïathuh lano ngin sdang biang”.
