SHILLONG:
U Myntri rangbah ka jylla, u Conrad K Sangma, ha ka 16 tarik, Naiwieng, u la ong ba ka sorkar kan khot halor ka ilekshon KHADC bad JHADC katkum ki kyndon treikam.
“Ngi la bud ïa ka kyndon bad ngi la ïaid shakhmat katkum ki kyndon khnang ba ha kano ka por ba ka tnad ka wanrah sha ka sorkar, kan sa rai kumno bad yn sa rai ïa ki tarik bad baroh bad kiwei kiwei,” ong u Sangma sha ki nongthoh kot khubor.
Haba la kylli ba lada ka jingthep vote ADC kan sa pynkynriah noh ha ka jingpeit jong ka amendment jong ka Sixth Schedule jong ka riti ka synshar, u MR u la ong ba ym don kano kano ka kaiphod ka ban wan ha u ha kane ka mat.
“Ngam shym ïohpdiang ïa kano kano ka kaiphod. Ym don kano kano ka kot ne file ha nga ha kaba ïadei bad kane. Tang haduh lada poi ki file ha ka kti jong nga bad sha u Myntri ka DCA, tang katta hi ngi la lah ban kynthoh halor ki kaiphod kiba wan na ka tnad,” bynrap u Sangma.
