SHILLONG:
Kum shi bynta ban ai ka jingkhublei Khristmas, ïa ki nongshong shnong jong ka 17 North Shillong, u kyrtong ka NPP u bah Ransom Sutnga u la pynlong ïa ka jingïalang ban ai sngewbha Khristmas ha ophis trei kam ka NPP ha ka 12 tarik Nohprah ha Nongmali.
Ha kane ka sngi u bah Ransom u la sam ïa ki jingai sngewbha sha ki nongshong shnong ka Nongmali da ki kombor sha kumba 300 ngut kiba dei na ki longïing kaba duk.
Kine ki 300 ngut ki kynthup ïa ki briew kiba la shongthait na ka kam bad ki briew kiba don jingduna ha ki dkhot met bad kiba dei na ka longïing ba duna ka jingïoh.
Ha kane ka sngi la pynphuh pynphieng da ka jingrwai ki khynnah rit ka jingot ïa u kek bad kiwei kiwei ki prokram ha ka jingdon ryngkat ki, ki khynnah rit ki kmie ki ba la wan sha kane ka jingïalang.
